கோவை : ஜெயலலிதா முதலமைச்சர் ஆவதற்கும், செல்லூர் ராஜூ அமைச்சராக இருப்பதற்கும், மக்களாகிய நாங்கள் போட்ட பிச்சைதான் காரணம் என கோவையில் நாம் தமிழர் கட்சியின் ஒருங்கிணைப்பாளர் சீமான் தெரிவித்துள்ளார்.
கோவை : ஜெயலலிதா முதலமைச்சர் ஆவதற்கும், செல்லூர் ராஜூ அமைச்சராக இருப்பதற்கும், மக்களாகிய நாங்கள் போட்ட பிச்சைதான் காரணம் என கோவையில் நாம் தமிழர் கட்சியின் ஒருங்கிணைப்பாளர் சீமான் தெரிவித்துள்ளார்.
கோவையில் செய்தியாளர்களிடம் அவர் பேசியதாவது :- முன்னாள் பிரதமர் ராஜீவ் காந்தி கொலை வழக்கில் தண்டனை பெற்ற ஏழு பேரின் விடுதலை தொடர்பாக பேசாவிட்டால், வாக்கு விழாது என்ற நெருக்கடியை பல்வேறு போராட்டங்கள் மூலம் கொடுத்ததால்தான் ஜெயலலிதா அதுபற்றி பேசினார். பொறுப்பில் உள்ள அமைச்சர் அடிப்படை தெரியாமல் பேசக் கூடாது. நாசாவிற்கு அனுப்பி வைத்திருக்க வேண்டியவரை, பல்லைக் கடித்துக்கொண்டு சகித்துக்கொண்டு அமைச்சராக வைத்துள்ளோம்.
அனைத்து கட்சிகளை சம எதிரியாகத் தான் பார்த்துப் போட்டியிடவுள்ளோம். 20 பெண்கள், 20 ஆண்களுக்கு வாய்ப்பு வழங்க இருக்கிறோம். மத்திய இடைக்கால பட்ஜெட் அடுத்த 5 ஆண்டிற்கான நிதிநிலை அறிக்கையாகும். வாக்குகளைப் பறிப்பதற்கு மறைமுக தேர்தல் அறிக்கையான, மறைமுக கையூட்டாகத்தான் இருக்கிறது. ராமநாதபுரத்தில் நடந்த கடல் தாமரை மாநாட்டில் மீன் வளத்துறைக்கு தனி அமைச்சகம் என்று சொன்னவர்கள், கடந்த 4 ஆண்டுகளில் நிறைவேற்றாத போது, தற்போது சொல்வது வேடிக்கையாக உள்ளது.
கட்சி ஆரம்பித்த பிறகு (ரஜினி) தஞ்சாவூர் பேரிடரில் பாதிக்கப்பட்டவர்களைப் பார்க்கலாம் என்பது மோசமான போக்காகும். தனது திரைப்பட பேனர்களுக்கு பால் ஊற்றாதீர்கள் என விஜய், சூர்யா சொல்லும்போது, பெரிய நட்சத்திரம் ஆனதிலிருந்து பேனர்களுக்கு பால் ஊற்றுவதை நிறுத்துங்கள் என ஒருமுறை கூட ஏன் ரசிகர்களுக்கு ரஜினி சொல்லவில்லை. திரையில் நடிப்பதன் மூலம் மட்டுமே நாடு ஆள தகுதியை தராது. அப்படி என்றால் நல்லக்கன்னு, நெடுமாறன் போன்றவர்கள் யார்..?. ஹேக் செய்துதான் 2014-ல் பா.ஜ.க. வெற்றிபெற்றது என சையது சுஜா சொன்னதற்கு பா.ஜ.க. தலைமை ஏன் பதில் அளிக்கவில்லை. ஸ்டாலின் ஆட்சியில் இருக்கும்போது கிராம சபை நடத்தியிருந்தால், கிராமம் முன்னேறி இருக்கும், எனக் கூறினார்.
இறுதியாக கவுசல்யா பணியிடை நீக்கம் குறித்த கேள்விக்கு சீமான் பதிலளிக்கையில், "இந்தியாவில் இறையாண்மை உள்ளதா..? என்பதே கேள்வியாக உள்ளது. சமூக வலைதளங்களில் மக்களிடம் விழிப்புணர்வை ஏற்படுத்துபவர்கள், அநீதியை எதிர்ப்பவர்கள் மற்றும் இயற்கை வளங்கள் சுரண்டல்களை கேள்வி கேட்பவர்களை நக்சல்கள் என பல்வேறு முத்திரைகள் குத்தப்படுகின்றனர்," என்றார்.