திருப்பூரில் 90 சதவீத ஆசிரியர்கள் பணிக்கு திரும்பியதாக மாவட்ட கல்வி அலுவலர் தகவல்

திருப்பூர் : திருப்பூரில் போராட்டத்தில் ஈடுபட்டு வந்த ஆசிரியர்களில் 90 சதவீதம் பேர் பணிக்கு திரும்பி விட்டதாக மாவட்ட கல்வி அலுவலர் சாந்தி தெரிவித்துள்ளார். 

9 அம்ச கோரிக்கைகளை வலியுறுத்தி தமிழகம் முழுவதும் ஜாக்டோ ஜியோ அமைப்பினர் தொடர் வேலைநிறுத்தப் போராட்டத்தில் ஈடுபட்டு வருகின்றனர். இதன் ஒரு பகுதியாக, திருப்பூர் மாவட்ட ஆட்சியர் அலுவலகம் அருகே மறியல் போராட்டத்தில் ஈடுபட்டு கைதாகி வருகின்றனர். இதனால், திருப்பூரில் பெரும்பாலான பள்ளிகளில் ஆசிரியர்கள் வராத காரணத்தால் மாணவர்களின் கல்வி பாதிக்கப்படுவதாகப் பெற்றோர்கள் புகார் தெரிவித்து வந்தனர். 



இந்த நிலையில், இன்று மாவட்ட கல்வி அலுவலர் சாந்தி தெரிவிக்கையில், "இன்றைக்கு 90 சதவீதம் பேர் பணிக்கு திரும்பியுள்ளனர். அதேபோல, தற்காலிக ஆசிரியர்களுக்கான விண்ணப்பங்கள் இதுவரை 2,000 பேர் பெற்றுள்ளனர்," எனக் கூறினார். 

இதனிடையே, திருப்பூர் அங்கேரிபாளையம் பகுதியில் உள்ள அரசுப்பள்ளியில் ஆசிரியர்கள் வராததைக் கண்டித்து பெற்றோர்கள் பள்ளி நுழைவு வாயிலை முற்றுகையிட்டு போராட்டத்தில் ஈடுபட்டனர். அதேபோல, குளத்துப்புதூர் பள்ளியில் ஆசிரியர் வராத காரணத்தால், பெற்றோர்கள் மாணவ, மாணவிகளை வீட்டிற்கு அழைத்துச் சென்றனர். இதேபோல, அவினாசி ஆட்டையம்பாளையம் பகுதியில் அரசுப் பள்ளி ஆசிரியர்கள் வராததால், மாணவர்கள் மற்றும் பெற்றோர்கள் அவிநாசி சாலையில் மறியல் போராட்டத்தில் ஈடுபட்டனர். இதனால், போக்குவரத்து பாதிக்கப்பட்டது. இதனையடுத்து, காவல்துறையினர் பேச்சுவார்த்தை நடத்தியதையடுத்து அவர்கள் கலைந்து சென்றனர். 

45 பேருக்கு 15 நாள் காவல்: 







9 அம்ச கோரிக்கைகளை வலியுறுத்தி நேற்றைய தினம் மறியல் போராட்டத்தில் ஈடுபட்டதாக கைது செய்யப்பட்ட ஜாக்டோ ஜியோ அமைப்பின் நிர்வாகிகள் 45 பேர் இன்று நீதிமன்றத்தில் ஆஜர்படுத்தப்பட்டனர். அப்போது, அவர்களுக்கு 15 நாள் காவல் விதித்து நீதிபதி உத்தரவிட்டார். இதையடுத்து, அவர்கள் கோவை மத்திய சிறைக்கு அனுப்பி வைக்கப்பட்டனர்.