கோவை : பழைய ஓய்வூதியத்தை அமல்படுத்த வேண்டும் உள்பட 9 அம்ச கோரிக்கைகளை வலியுறுத்தி கோவை ஆட்சியர் அலுவலகம் முன்பு 7-வது நாளாக போராட்டத்தில் ஈடுபட்ட சுமார் 2,000 ஆசிரியர்களை போலீசார் இன்று கைது செய்தனர்.
கோவை : பழைய ஓய்வூதியத்தை அமல்படுத்த வேண்டும் உள்பட 9 அம்ச கோரிக்கைகளை வலியுறுத்தி கோவை ஆட்சியர் அலுவலகம் முன்பு 7-வது நாளாக போராட்டத்தில் ஈடுபட்ட சுமார் 2,000 ஆசிரியர்களை போலீசார் இன்று கைது செய்தனர்.
புதிய ஓய்வூதிய திட்டமான சி.பி.எஸ். திட்டத்தை ரத்து செய்ய வேண்டும், பழைய ஓய்வூதிய திட்டத்தை நடைமுறைப்படுத்த வேண்டும், பள்ளி கல்வி துறையையும் தொடக்கக் கல்வி துறையும் இணைக்கக் கூடாது மற்றும் இடைநிலை ஆசிரியர்களை அங்கன்வாடி பள்ளிகளுக்குப் பணியிட மாற்றம் செய்வதை ரத்து செய்ய வேண்டும் உள்ளிட்ட 9 அம்ச கோரிக்கைகளை வலியுறுத்தி ஜாக்டோ ஜியோ அமைப்பினர் தமிழகம் முழுவதும் ஆர்ப்பாட்டத்தில் ஈடுபட்டு வருகின்றனர்.
கடந்த 6 நாட்களாக தொடர் போராட்டத்தில் ஈடுபட்டு, கைதாகி விடுதலையான ஜாக்டோ-ஜியோ அமைப்பினர், 7வது நாளாக இன்றும் மாவட்ட தலைநகரங்களில் முற்றுகையிட்டு போராட்டம் நடத்தி வருகின்றனர். இதன் ஒரு பகுதியாக, கோவை மாவட்ட ஆட்சியர் அலுவலகம் முன்பு சுமார் 2,000-க்கும் மேற்பட்டோர் போராட்டத்தில் ஈடுபட்டனர். அவர்களை போலீசார் கைது செய்தனர்.
"அரசு எங்களது கோரிக்கையை நிறைவேற்றும் வரையில், இந்த வேலைநிறுத்தப் போராட்டத்தை கைவிடப் போவதில்லை," என்கின்றனர் போராட்டக்காரர்கள்.
இதனிடையே, தற்காலிக ஆசிரியர்களை நியமிக்க தமிழக அரசு ஒருபுறம் நடவடிக்கை எடுத்து வந்தாலும், தற்போது வரை பெரும்பாலான பள்ளிகள் மூடப்பட்டே கிடக்கின்றன. கோவையில் மணியத்தோட்டம் பகுதியில் உள்ள பெண்கள் நடுநிலைப்பள்ளி தற்போது வரை மூடியே கிடக்கிறது. பள்ளிக்கு வரும் மாணவிகள், அலுவலக அறையில் அமர வைக்கப்படுகின்றனர்.
"இன்று பள்ளி செயல்படும் என எதிர்பார்த்து வந்தோம். ஆனால், நிலைமை மாறாக உள்ளது," என்கின்றனர் பள்ளி மாணவர்கள்.
இது குறித்து பதிவு அலுவலர் கூறுகையில், "1 முதல் 8-வது வரையிலான வகுப்புகளைக் கொண்ட இந்தப் பள்ளியில் மொத்தம் 98 மாணவிகள் பயின்று வருகின்றனர். அவர்களுக்கு பாடம் நடத்துவதற்காக 5 ஆசிரியர்கள் நியமிக்கப்பட்டுள்ளனர்," என்றார்.
"கோவை மாவட்டத்தில் ஆரம்ப மற்றும் நடுநிலைப் பள்ளிகளைச் சேர்ந்த 3,152 ஆசிரியர்கள் பணியைப் புறக்கணித்து, வேலைநிறுத்தப் போராட்டத்தில் ஈடுபட்டுள்ளனர்," எனக் கூறுகிறார் மாவட்ட முதன்மை கல்வி அலுவலர்.
இதேபோல, திருப்பூர் மாவட்ட ஆட்சியர் அலுவலகம் முன்பு போராட்டத்தில் ஈடுபட்ட ஜாக்டோ ஜியோ அமைப்பைச் சேர்ந்த 1,500-க்கும் மேற்பட்டோர் கைது செய்யப்பட்டனர். அப்போது, போலீசாருக்கும், அரசு ஊழியர்களுக்குமிடையே லேசான தள்ளுமுள்ளு ஏற்பட்டது.
