வேலைவாய்ப்பு அலுவலக பதிவை புதுப்பிக்க சலுகை : விண்ணப்பிக்க கடைசி தேதி ஜன., 24

கோவை: வேலைவாய்ப்பு அலுவலக பதிவினை புதுப்பிக்க தவறியவர்களுக்காகத் தமிழக அரசு அறிவித்துள்ள சிறப்பு புதுப்பித்தல் சலுகை ஜனவரி 24-ம் தேதி நிறைவடைகிறது. 

இன்று கோவை மாவட்ட ஆட்சியர் ஹரிஹரன் வேலைவாய்ப்பு அலுவலக பதிவை புதுப்பிப்பதற்கான அறிக்கையை வெளியிட்டார். அதில் தமிழக அரசு வேலைவாய்ப்பு பதிவினை புதுப்பிக்க முயற்சி செய்பவர்களுக்காக கடந்த அக்டோபர் மாதம் 25 -ம் தேதி ஒரு அரசாணை வெளியிட்டது பற்றி எழுதப்பட்டிருந்தது. 

அந்த ஆணையின்படி, 2016 -ம் ஆண்டு ஜனவரி 1 -ம் தேதி முதல் அதே வருடம் டிசம்பர் மாதம் 31 -ம் தேதி வரையில் வேலை வாய்ப்பு அலுவலகப் பதிவினை புதுப்பிக்கத் தவறிய பதிவுதாரர்கள் மீண்டும் தங்களது பதிவினை புதுப்பிக்க சலுகை வழங்கப்படுகிறது. 

மேலும், புதுப்பிக்கத் தவறியவர்கள் ஜனவரி 24-ம் தேதி வரை மட்டுமே இணையதளம் வாயிலாகவோ, பதிவஞ்சல் மூலமாகவோ, வேலைவாய்ப்பு அலுவலகத்திலோ புதுப்பித்துக் கொள்ளலாம். அதன் பின்னர் அனுப்பப்படும் விண்ணப்பங்கள் ஏற்றுக் கொள்ளப்படமாட்டாது எனக் குறிப்பிடப்பட்டிருந்தது.