திருப்பூர் : அரசு கல்லூரியில் மரக்கன்றுகளுக்கு அடையாளம் தெரியாத நபர்கள் தீ வைத்ததால், சேதமடைந்த மரக்கன்றுகளை கண்ட ஆசிரியர் மூச்சு திணறியதால் தனியார் மருத்துவமனையில் அனுமதிக்கப்பட்டுள்ளார்.
திருப்பூர் : அரசு கல்லூரியில் மரக்கன்றுகளுக்கு அடையாளம் தெரியாத நபர்கள் தீ வைத்ததால், சேதமடைந்த மரக்கன்றுகளை கண்ட ஆசிரியர் மூச்சு திணறியதால் தனியார் மருத்துவமனையில் அனுமதிக்கப்பட்டுள்ளார்.
திருப்பூர் சிக்கண்ணா அரசு கலைக் கல்லூரியில் நாட்டுநலப்பணித் திட்ட மாணவர்கள் அலகு 2 -ன் சார்பில் கல்லூரி வளாகத்தில் 1000 -க்கும் மேற்பட்ட மரக்கன்றுகள் நடப்பட்டன. கலாம் பூங்கா என்ற பெயரில் கடந்த மூன்று ஆண்டுகளாக பராமரிக்கப்பட்ட அனைத்து மக்கன்றுகளும் 4 முதல் 9 அடி வரையிலும் மரமாக வளர்ந்து வரும் நிலையில் இருந்தது. இந்நிலையில், நேற்றிரவு அடையாளம் தெரியாத நபர்கள் இந்த பூங்காவிற்கு தீ வைத்துள்ளனர்.
இந்த சம்பவத்தில் மர்மநபர்களால் 100 -க்கும் மேற்பட்ட மரங்கள் எரிந்து கருகியுள்ளது. இன்று காலை வனவிலங்குகள் பாதுகாப்பு வார விழாவிற்காக வருகை தந்த மாணவர்கள் மரங்கள் எரிக்கப்பட்டிருப்பதைக் கண்டு அதிர்ச்சியடைந்து தங்கள் ஆசிரியருக்கு தகவல் தெரிவித்துள்ளனர். விரைந்து வந்த உயிரியல் ஆசிரியரும், நாட்டு நலப்பணித்திட்ட அலகு 2 -ன் ஆசிரியருமான மோகன் எரிந்து கருகிய மரங்களைக் கண்டு அதிர்ச்சியடைந்து கதறி அழுததுடன் அதே இடத்தில் மயக்கமடைந்து கீழே விழுந்தார்.
இதனையடுத்து, அவரை மீட்ட மாணவர்கள் தனியார் மருத்துவமனையில் அனுமதித்தனர். தாங்கள் ஆசையாக வளர்த்த மரங்களை எரித்து சேதப்படுத்தியவர்கள் மீது உரிய நடவடிக்கை எடுக்க வேண்டும் என மாணவர்கள் கோரிக்கை விடுத்துள்ளனர்.