கோடநாடு வீடியோ விவகாரம் : தெஹல்கா முன்னாள் ஆசிரியரை கைது செய்ய விரைந்த தனிப்படை

கோடநாடு எஸ்டேட் வழக்கு தொடர்பாக காணொளி ஆதாரம் வெளியிட்ட தெஹல்கா பத்திரிகையின் முன்னாள் ஆசிரியர் மேத்யூ சாமுவேல் உள்ளிட்ட மூன்று பேரை பிடிக்கத் தனிப்படை போலீசார் டெல்லி விரைந்துள்ளனர். 

தெஹல்கா பத்திரிகையின் முன்னாள் ஆசிரியர் மேத்யூ சாமுவேல் கோடநாடு எஸ்டேட்டில் நடைபெற்ற கொலை மற்றும் கொள்ளை சம்பவங்கள் தொடர்பாக டெல்லியில் வீடியோ ஆதாரத்தை வெளியிட்டார். எஸ்டேட் கொள்ளையில் தொடர்புடைய 5 பேர் மரணம் சந்தேகத்தை ஏற்படுத்துவதாகக் இவர் கூறினார். மேலும், அவர், சயன் மற்றும் வாளையார் மனோஜ் ஆகியோரிடம் எடுத்த பேட்டிகளையும் வெளியிட்டிருந்தார். 



இதையடுத்து, உரிய விசாரணை நடத்தக் கோரி எதிர்கட்சிகள் உட்பட சில கட்சிகள் வலியுறுத்தி வருகின்றன. அந்தக் குற்றச்சாட்டுகளை மறுத்துள்ள முதல்வர் எடப்பாடி பழனிசாமி, இதுதொடர்பாக புகார் அளிக்கப்பட்டுள்ளது என்று தெரிவித்தார். இதைத் தொடர்ந்து, மேத்யூஸ் மீது தமிழ்நாடு சைபர் கிரைம் போலீசார் வழக்கு பதிவு செய்தனர். மேலும், காணொளியில் பேட்டியளித்த சயன், மனோஜ் ஆகியோர் மீதும் வழக்குப் பதியப்பட்டது. இந்த வழக்கை அ.தி.மு.க தொழில்நுட்பப் பிரிவு மாநில இணைத்தலைவர் ராஜன் சத்யா அளித்துள்ளார். 

இதையடுத்து, கோடநாடு வழக்கு தொடர்பாக சென்னை மத்திய குற்றப்பிரிவு துணை ஆணையர் எஸ்.ஆர்.செந்தில்குமார் தலைமையில் தனிப்படை அமைக்கப்பட்டுள்ளது. முதல்வர் பழனிசாமி மீது அவதூறு பரப்பும் நோக்கில் காணொளி ஆதாரம் வெளியிட்ட மேத்யூ சாமுவேல் உட்பட மூவரை பிடிக்க தனிப்படை டெல்லிக்கும், வழக்கில் தொடர்புடைய மனோஜ், சயான் ஆகியோர் கேரளாவில் பதுங்கியுள்ளதாக வெளியான தகவலையடுத்து, மற்றொரு குழு கேரளாவுக்கும் விரைந்துள்ளன, என இந்தியன் எக்ஸ்பிரஸ் இணையதளத்தில் பதிவாயிருந்தது. 

இதனிடையே, தெஹல்கா முன்னாள் ஆசிரியர் மேத்யூ சாமுவேல் தனது முகநூல் பக்கத்தில் பதிவொன்றை வெளியிட்டுள்ளார். அந்த பதிவில் கூறியிருப்பதாவது :- கோடநாடு மர்ம மரணங்கள் குறித்து தமிழக முதல்வர் எடப்பாடி பழனிசாமியைக் குற்றம்சாட்டி நான் வீடியோ வெளியிட்டதை அடுத்து, அவர் என் மீது சென்னை போலீசில் அவதூறு பரப்பியதாகப் புகார் அளித்திருக்கிறார். 

மேலும், சென்னை மற்றும் டெல்லியில் உள்ள எனது ஊடக நண்பர்கள் சிலர் என்னைக் கைது செய்வதற்காக தமிழகப் போலீசார், டெல்லி வந்திருப்பதாகத் தெரிவித்தனர். மேலும், என்னுடைய வீட்டை சோதனையிடவும் அவர்கள் திட்டமிட்டிருப்பதாகத் தெரிகிறது. அதேபோல், சயன் மற்றும் வாளையார் மனோஜ் ஆகியோரையும் போலீஸார் கைது செய்ய இருக்கிறார்கள்.

இந்திய வரலாற்றில் முதல்முறையாக 5 கொலைகளில் தொடர்புடையதாக முதலமைச்சர் மீது புகார் எழுந்துள்ளது. இந்தசூழலில், அந்தக் கொலைகளின் பின்னணியில் இருப்பது தமிழக முதல்வர் எடப்பாடி பழனிசாமிதான் என்பதை நான் திட்டவட்டமாகக் கூறிக்கொள்கிறேன், இவ்வாறு அந்த பதிவில் இருந்தது.