கோவையில் இளைஞரை கடத்தி கொலை செய்த நண்பர்கள் : இருவர் கைது

கோவை : கவுண்டம்பாளையத்தில் காணாமல் போனதாக வழக்குப்பதிவு செய்யப்பட்டு தேடப்பட்டு வந்த இளைஞரை, கடத்திக் கொன்ற நண்பர்கள் இருவரைக் கைது செய்த போலீசார் தலைமறைவான மூன்று பேரை தேடி வருகின்றனர். 

கோவை, கவுண்டம்பாளையத்தில் உள்ள பூக்கடையில் வேலை செய்து வந்தவர் ராஜா (25). இவர் கடந்த 3 -ம் தேதி வேலைக்கு சென்றபின் வீடு திரும்பவில்லை. சந்தேகமடைந்த உறவினர்கள் துடியலூர் காவல் நிலையத்தில் புகார் அளித்தனர். இதில் துடியலூர் போலீசார், ஆளைக் காணவில்லை என வழக்குப் பதிவு செய்து விசாரணை நடத்தினர்.

 

விசாரணையின் ஒரு பகுதியாக கைப்பேசி உரையாடல்களை எடுத்துக் கொண்டனர். இதன் மூலம் ராஜா கடத்தப்பட்டுள்ளது தெரியவந்தது. இந்த சம்பவம் தொடர்பாக ராஜாவின் நண்பர்களான காளி மற்றும் தர்மன் ஆகியோரை போலீசார் கைது செய்து விசாரணை மேற்கொண்டதில், ராஜாவை மதுபோதையில் இருசக்கர வாகனத்தில் கடத்தி சென்று குத்திக் கொலை செய்ததை ஒப்புக் கொண்டனர். 

இதையடுத்து, கொலையில் தொடர்புடைய விஜயகுமார், சபரி, நல்லேந்திரன் ஆகியோரையும் போலீசார் தீவிரமாக தேடி வருகின்றனர். இதனிடையே, விஜயகுமார் மற்றும் நல்லேந்திரன் மீது ஏற்கனவே கொலை வழக்கு உள்ளது. இந்நிலையில் இன்று மாலை 5.50 மணியளவில் 3 ஜீப்புகளில் ஆய்வாளர் தலைமையில், இயங்கும் தடயவியல் போலீசாருடன் கணுவாய் தடுப்பணை பள்ளத்திற்கு போலீசார் வந்தனர். 

அதன் பின்பு பிரேதத்தை மீட்டு கோவை அரசு மருத்துவமனைக்குக் கொண்டு சென்றனர். இந்நிலையில், இறந்த பிரேதமானது அழுகிபோய் எழும்பு கூடாக இருந்தது. துடியலூர் போலீசார் இந்த கொலை வழக்கு தொடர்பாக, சைபர் க்ரைம் போலீசார் உதவியுடன் தலைமறைவாக இருக்கும் மற்ற குற்றவாளிகளை தீவிரமாகத் தேடி வருகின்றனர். நேற்றிரவே பிரேதம் இருக்கும் இடம் தெரிந்தும், இன்று மாலை வரை போலீசார் உடலை மீட்காமல் இருந்தது குறிப்பிடத்தக்கது.