கோவை கடைகளில் சோதனை : 1759.5 கிலோ பிளாஸ்டிக் பொருட்கள் பறிமுதல்

கோவை : கோவையில் 2189 கடைகளில் சோதனை மேற்கொள்ளப்பட்டதில் 1759.5 கிலோ எடையில் தடைசெய்யப்பட்ட பிளாஸ்டிக் பொருட்கள் பறிமுதல் செய்யப்பட்டுள்ளது.

கோவை மாநகராட்சி பகுதியில் மண்டல சுகாதார அதிகாரிகள், அலுவலர்கள் ஜனவரி 1 -ம் தேதி முதல் 4 -ம் தேதி வரை ஓட்டல்கள், கடைகள் என பல்வேறு இடங்களில் சோதனை நடத்தினர். அதன்படி, வடக்கு மண்டலப் பகுதியில் 463 கடைகளில் விதிமீறி வைத்திருந்த, 215 கிலோ பிளாஸ்டிக் பொருட்கள் பறிமுதல் செய்யப்பட்டன. இதையடுத்து, ரூ.1 லட்சத்து 58 ஆயிரம் மதிப்பிலான அபராதம் விதிக்கப்பட்டது. 



இதைப் போலவே, தெற்கு மண்டலத்தில் 532 கடைகளில் நடைபெற்ற சோதனையில் 301.5 கிலோ தடை செய்யப்பட்ட பிளாஸ்டிக் பொருட்கள் பறிமுதல் செய்யப்பட்டு, ரூ.13,200 மதிப்பில் அபராதம் விதிக்கப்பட்டது. கிழக்கு மண்டலத்தில் 354 கடைகளில் நடைபெற்ற சோதனையில் 239 கிலோ தடை செய்யப்பட்ட பிளாஸ்டிக் பொருட்கள் பறிமுதல் செய்யப்பட்டு, ரூ.18,500 மதிப்பில்அபராதம் விதிக்கப்பட்டது. 

இதனைத் தொடர்ந்து ,மேற்கு மண்டலத்தில் 673 கடைகளில் நடைபெற்ற சோதனையில் 649 கிலோ தடை செய்யப்பட்ட பிளாஸ்டிக் பொருட்கள் பறிமுதல் செய்யப்பட்டு, ரூ18, 350 மதிப்பில் அபராதம் விதிக்கப்பட்டது. மத்திய மண்டலத்தில் 167 கடைகளில் நடைபெற்ற சோதனையில் 355 கிலோ தடை செய்யப்பட்ட பிளாஸ்டிக் பொருட்கள் பறிமுதல் செய்யப்பட்டு, ரூ.22,360 மதிப்பில் அபராதம் விதிக்கப்பட்டது. 

இது குறித்து மாநகராட்சி ஆணையாளர் மற்றும் தனி அலுவலர் க.விஜயகார்த்திகேயன் தெரிவித்ததாவது ;- அனைத்து மண்டலங்களிலும் கிட்டத்தட்ட 2189 கடைகளில் சோதனை மேற்கொள்ளப்பட்டதில் தடைசெய்யப்பட்ட பிளாஸ்டிக் பொருட்கள் 1759.5 கிலோ பறிமுதல் செய்யப்பட்டுள்ளது. இதற்காக, ரூ.2 லட்சத்து 30 ஆயிரத்து 410 மதிப்பில் அபராதம் விதித்து நடவடிக்கை மேற்கொள்ளப்பட்டுள்ளது. இவ்வாறு தெரிவித்தார்.