மேகி நூடுல்ஸில் அனுமதிக்கப்பட்ட வேதிப்பொருளின் அளவு அதிகம் : நெஸ்லே நிறுவனம் நீதிமன்றத்தில் ஒப்புதல்

டெல்லி : நெஸ்லே நிறுவனத்தின் மேகி நூடுல்ஸில் அனுமதிக்கப்பட்ட அளவை விட வேதிப் பொருளின் அளவு அதிகமாக இருப்பதாக அந்நிறுவனம் நீதிமன்றத்தில் ஒப்புக் கொண்டுள்ளது. 

நெஸ்ட்லே நிறுவன தயாரிப்பான மேகி நூடுல்ஸில் அளவுக்கு அதிகமாக மோனோசோடியம் க்ளூட்டமேட் மற்றும் ஈயம் இருப்பதை உத்தரபிரதேச மாநில உணவு பாதுகாப்பு மற்றும் மருந்து நிர்வாகம் கண்டுபிடித்தது. இதையடுத்து நிர்ணயிக்கப்பட்ட அளவுக்கு அதிகமாக காரீயம் இருந்ததால், நெஸ்லே நிறுவனத்தின் மிகவும் பிரபலமான மேகி நூடூல்ஸ்க்கு தடை விதிக்கப்பட்டது.

பாதுகாப்பற்ற உணவுப் பொருளான மேகியை முறையற்ற வகையில் விற்பனை செய்ததற்காக 'நெஸ்லே இந்தியா' நிறுவனம் ரூ. 640 கோடியை இழப்பீடாக தரவேண்டும் என்று மத்திய அரசு வழக்கு தொடர்ந்திருந்தது. இந்த வழக்கு உச்சநீதிமன்றத்தில் தொடர்ந்து விசாரிக்கப்பட்டு வருகிறது. 

இந்த நிலையில், இன்றைய விசாரணையின் போது, நெஸ்லே நிறுவனத்தின் வழக்கறிஞர் நீதிமன்றத்தில் வாதாடுகையில், தங்களது நிறுவனத்தின் தயாரிப்பான மேகியில் ஈயத்தின் அளவு அனுமதிக்கப்பட்ட அளவை விட அதிகமாக இருப்பதை ஒப்புக் கொண்டார். இதைத் தொடர்ந்து, உலகம் முழுவதும் கோடிக்கணக்கான மக்கள் உண்ணும் உங்களது தயாரிப்பில் உருவாகும் மேகி நூடுல்ஸில், வேதிப்பொருளை அனுமதிக்கப்பட்ட அளவே ஏன் சேர்க்கக் கூடாது எனவும் நீதிபதிகள் கேட்டனர்.