கோவையில் உளவுத்துறை அதிகாரியென போலி ஆவணங்களுடன் சுற்றிய நபர் கைது : போலியான ஆவணங்கள், ஏர்கன் பறிமுதல்

கோவை : தொண்டாமுத்தூர் அருகே உளவுத்துறை அதிகாரி என போலியாக தயாரித்த ஐடி கார்டு மற்றும் ஏர்கன்னுடன் சுற்றித் திரிந்த நபரை போலீசார் கைது செய்தனர்.

திருச்சி ஸ்ரீரங்கம் பகுதியைச் சேர்ந்தவர் விஜயராமன் ஐயர் (48). இவர் கடந்த சில வருடங்களாக தொண்டாமுத்தூர் பகுதியில் வசித்து வருகிறார். இவர் தொண்டாமுத்தூர் பகுதிகளில் உளவுத்துறை அதிகாரி என பொதுமக்களிடம் பொய் சொல்லி ஏமாற்றி வந்துள்ளார். 



இந்நிலையில், தொண்டாமுத்தூர் பகுதியில் உள்ள மாரியம்மன் கோயில் அருகே ஏர்கன் துப்பாக்கியுடன் ஒரு நபர் சுற்றி வருவதாக பொதுமக்கள் காவல்துறைக்குத் தகவல் தெரிவித்தனர். இதையடுத்து, விரைந்து வந்த தொண்டாமுத்தூர் காவல்துறை அதிகாரிகள், துப்பாக்கியுடன் சுற்றி திரிந்த விஜயராமன் ஐயரைக் கைது செய்து விசாரணை மேற்கொண்டனர். 

அந்த விசாரணையில் காவல்துறையிடமே, விஜயராமன் தான் மத்திய உளவுப்பிரிவு 'ரா' அமைப்பில் பணி செய்து வருவதாகவும், இஸ்ரேல் நாட்டின் மொசாத் பிரிவில் செயல்பட்டு வருவதாகவும் தெரிவித்துள்ளார். இதையடுத்து, சந்தேகம் அடைந்த போலீசார் மத்திய உளவு பிரிவு அதிகாரிகளுக்குத் தகவல் கொடுத்தனர். 

மேலும், அவரை வடவள்ளி காவல் நிலையம் அழைத்துச் சென்று மேற்கொண்டு விசாரணை நடத்தியுள்ளனர். அதில் அவர் போலியான உளவுத்துறை ஐடி கார்டை தயாரித்து வைத்துக்கொண்டு, ஏர்கன்களுடன் சுற்றி வந்துள்ளது தெரியவந்தது. இதையடுத்து, விஜயராமன் ஐயர் வைத்திருந்த போலியான ஆவணங்கள் மற்றும் ஏர்கன்னை போலீசார் பறிமுதல் செய்தனர்.