கோவையில் சீட்டு நிறுவனம் நடத்தி பண மோசடி செய்தவர் கைது

கோவை : கோவை சரவணம்பட்டி அருகே சீட்டு நிறுவனம் நடத்தி மோசடியில் ஈடுபட்டவர் கைது செய்யப்பட்டார்.

திருச்செங்கோட்டை சேர்ந்தவர் சுவாமிநாதன் (39). இவர் கோவை சரவணம்பட்டி அம்பாள் நகரில் பிரனோ சிட்ஸ் & ரியல் எஸ்டேட் என்ற பெயரில் சீட்டு நிறுவனம் நடத்தி வருகிறார். இதில் பழனிச்சாமி என்பவர் 2014 -ம் ஆண்டு முதல் 2016 -ம் ஆண்டு வரை கிட்டத்தட்ட ரூ.29 லட்சம் வரை சீட்டுக்கும் ரியல் எஸ்டேட்டுக்கும் சாமிநாதனிடம் செலுத்தியுள்ளார். 

ஆனால், இந்தப் பணத்தை பழனிச்சாமி சாமிநாதனிடம் திரும்பக் கேட்கையில், சாமிநாதன் பணத்தைத் தர மறுத்ததுடன் மிரட்டல் விடுத்துள்ளார். இதையடுத்து, அன்னூரை சேர்ந்த பழனிச்சாமி கோவை மாநகர காவல் ஆணையரிடம் புகார் அளித்தார். இந்தப் புகாரின் பேரில் கோவை மாநகர காவல் ஆணையாளர் சுமித்சரண் உத்தரவிட சாமிநாதன் மீது மோசடி, கொலை மிரட்டல் உள்ளிட்ட பிரிவுகளின் கீழ் நான்கு வழக்குகள் பதிவு செய்யப்பட்டது. 

இதையடுத்து, காவல்துறை அவரைக் கைது செய்து கோவை மத்திய சிறையில் அடைத்தனர். மேலும், இவர் நாம் தமிழர் கட்சியில் இருப்பதாகவும் இவர் பல்வேறு மாவட்டங்களில் இது போன்ற மோசடிகளில் ஈடுபட்டுள்ளார் என்பதும் தெரியவந்துள்ளது. இதைத் தொடர்ந்து, சுவாமிநாதன் தனிநபரா அல்லது குழுவாக இணைந்து செயல்படுகின்றனரா என்ற கோணத்தில் காவல்துறை விசாரித்து வருகின்றனர்.