கோவையில் கடந்த 24 மணிநேரத்தில் பன்றிக் காய்ச்சலுக்கு 3 பேர் உயிரிழப்பு

கோவை : கோவை அரசு மருத்துவமனையில், கடந்த 24 மணிநேரத்தில் பன்றிக்காய்ச்சல் பிரிவில் அனுமதிக்கப்பட்டிருந்தவர்களில் சிகிச்சை பலனின்றி உயிரிழந்தவர்களின் எண்ணிக்கை 3 ஆக அதிகரித்துள்ளது. 

தமிழகம் முழுவதும் நிலவி வரும் பருவநிலை மாற்றங்கள் காரணமாக பல்வேறு வகையான காய்ச்சல்கள் பரவி வருகின்றன. குறிப்பாக, பெரும்பாலானோர் கோவை அரசு மருத்துவமனையில் பன்றி மற்றும் மர்ம காய்ச்சலுக்கு சிகிச்சை பெற்று வருகின்றனர். கடந்த 24-ம் தேதி திருப்பூர் மாவட்டம் தாராபுரம் கந்தசாமி என்பவர் பன்றிக் காய்ச்சல் காரணமாக கோவை அரசு மருத்துவமனையில் அனுமதிக்கப்பட்டார். இந்த நிலையில், கந்தசாமி இன்று காலை சிகிச்சை பலனின்றி பரிதாபமாக உயிரிழந்தார்.

அதேபோல, கோவை, சூலூர் அப்பநாயக்கம்பட்டியைச் சேர்ந்த விஜயலட்சுமி (50) கடந்த 9-ம் தேதி பன்றிக் காய்ச்சல் காரணமாக அரசு மருத்துவமனையில் அனுமதிக்கப்பட்ட நிலையில், அவரும் சிகிச்சை பலனின்றி நேற்றிரவு உயிரிழந்தார். இதேபோல, சூலூர் முத்துகவுண்டன் புதூரைச் சேர்ந்த முருகதாஸின் மனைவி மணியம்மாள் (38). இவர், பன்றிக் காய்ச்சலால் பாதிக்கப்பட்டு, கடந்த 2-ம் தேதி முதல் கோவை அரசு மருத்துவமனையில் சிகிச்சை பெற்று வந்தார். இந்த நிலையில், அவர் இன்று மதியம் சிகிச்சை பலனின்றி உயிரிழந்தார். 

மேலும், கோவை அரசு மருத்துவமனையில் பன்றிக்காய்ச்சல் காரணமாக 23 பேரும், டெங்கு காய்ச்சல் காரணமாக 4 பேரும், வைரஸ் காய்ச்சல் காரணமாக 63 பேரும் என மொத்தம் 90 பேர் சிகிச்சை பெற்று வருகின்றனர்.