வேலைநிறுத்தப் போராட்டத்தையும் மீறி கோவையில் இருந்து கேரளாவிற்கு காய்கறி ஏற்றிச் சென்ற லாரியின் மீது மர்ம நபர்கள் கல்வீசித் தாக்குதல் நடத்திய சம்பவத்தில் அதன் க்ளீனர் பரிதாபமாக உயிரிழந்தார்.
வேலைநிறுத்தப் போராட்டத்தையும் மீறி கோவையில் இருந்து கேரளாவிற்கு காய்கறி ஏற்றிச் சென்ற லாரியின் மீது மர்ம நபர்கள் கல்வீசித் தாக்குதல் நடத்திய சம்பவத்தில் அதன் க்ளீனர் பரிதாபமாக உயிரிழந்தார்.
சுங்கவரிக் கட்டணம், பெட்ரோல், டீசல் விலை உயர்வை ரத்து செய்ய வேண்டும் உள்ளிட்ட 5 அம்ச கோரிக்கைகளை வலியுறுத்தி லாரி உரிமையாளர்களின் வேலை நிறுத்தம் இன்று 4-வது நாளாக நீடிக்கிறது. இந்த வேலைநிறுத்தம் காரணமாக விளைவித்த பொருட்களை பிற மாவட்டங்கள் அல்லது மாநிலங்களுக்கு எடுத்துச் சென்று விற்பனை செய்ய முடியாமல் விவசாயிகள் திணறி வருகின்றனர். கடந்த 4 நாட்களில் மட்டும் ரூ. 15,000 கோடி வர்த்தகம் பாதிக்கப்பட்டுள்ளது.
இந்த நிலையில், கோவையில் இருந்து கேரள மாநிலம் ஆலப்புழாவிற்கு வேலைநிறுத்தத்தையும் மீறி, ஓட்டுநர் நூருல்லா லாரியில் காய்கறிகளை ஏற்றிச் சென்றார். லாரி கேரள மாநிலத்திற்குள் நுழைந்து கஞ்சிக்கோடு பகுதி அருகே சென்று கொண்டிருந்தது. அப்போது, லாரி உரிமையாளர்களின் வேலைநிறுத்தத்தையும் பொருட்படுத்தாமல் லாரியை இயக்கியதால், 10-க்கும் மேற்பட்ட மர்ம நபர்கள் சிலர் அந்த வாகனத்தின் மீது கற்களை எரிந்து தாக்குதல் நடத்திவிட்டு தப்பியோடியது.
இதில், லாரியின் க்ளீனர் பாட்ஷா பலத்த காயமடைந்தார். இதைத்தொடர்ந்து, அவர் மருத்துவமனைக்கு அழைத்துச் செல்லும் வழியில் பரிதாபமாக உயிரிழந்தார். ஓட்டுனர் நூருல்லா ஆபத்தான நிலையில் மருத்துவமனையில் சிகிச்சை பெற்று வருகிறார். இது தொடர்பாக கேரள போலீசார் வழக்குப்பதிவு செய்து விசாரணை மேற்கொண்டு வருகின்றனர்.
ஒரு சில கோரிக்கைகளுக்காக லாரி உரிமையாளர்கள் வேலைநிறுத்தத்தில் ஈடுபட்டுள்ள நிலையில், விவசாயிகளுக்கு ஆதரவாக செயல்பட்டக் காரணத்தினால், கோவையைச் சேர்ந்த லாரியின் க்ளீனர் அடித்துக் கொல்லப்பட்ட சம்பவம் அனைவரிடத்தில் அதிர்ச்சியை ஏற்படுத்தியுள்ளது.