சிங்காநல்லூரில் ஆவணமின்றி கொண்டுவரப்பட்ட ரூ.10.18 கோடி தங்கம், வைர நகைகள் பறிமுதல்

Coimbatore: சிங்காநல்லூர் தொகுதியில் உள்ள கொடிசியா பகுதியில் தேர்தல் பறக்கும் படை அதிகாரிகள் ஆவணமின்றி கொண்டுவரப்பட்ட ரூ.10.18 கோடி மதிப்பிலான தங்கம் மற்றும் வைர நகைகளை பறிமுதல் செய்துள்ளனர்.




தேர்தல் பறக்கும் படை அதிகாரி சாமிநாதன் தலைமையில் காவல் உதவி ஆய்வாளர் ஜில்லி கிரிஸ்டி உள்ளிட்ட அதிகாரிகள் ஏப்ரல் 15ம் தேதி மாலை கொடிசியா பகுதியில் வாகனச் சோதனையில் ஈடுபட்டிருந்தனர். அப்போது அவ்வழியே வந்த வேனை நிறுத்தி சோதனை மேற்கொண்ட அதிகாரிகள், அதில் தங்கம் மற்றும் வைர நகைகள் இருப்பதை கண்டறிந்தனர்.




வேனை ஓட்டி வந்த நபரிடம் விசாரணை மேற்கொண்ட அதிகாரிகள், அவர் அதிவீரபாண்டியன் என்பதும், நகைகளை தனியார் நிறுவனத்துக்கு கொண்டு சென்றதும் தெரியவந்தது. ஆனால், உரிய ஆவணங்கள் இல்லாததால் நகைகளை பறிமுதல் செய்த அதிகாரிகள், அவற்றை அரசு கருவூலத்துக்கு அனுப்பி வைத்தனர்.




பறிமுதல் செய்யப்பட்ட நகைகளின் மொத்த மதிப்பு ரூ.10 கோடியே 18 லட்சத்து 21 ஆயிரம் என்று அதிகாரிகள் தெரிவித்தனர். இது தொடர்பாக மேலும் விசாரணை நடைபெற்று வருகிறது.




இதேபோல், Coimbatore மாவட்டத்தின் பல்வேறு பகுதிகளில் செவ்வாய்க்கிழமை காலை முதல் புதன்கிழமை வரை அதிகாரிகள் மேற்கொண்ட வாகனச் சோதனையில் ரூ.22.86 லட்சம் மதிப்பிலான பணம் மற்றும் பொருள்கள் பறிமுதல் செய்யப்பட்டுள்ளன என்பது குறிப்பிடத்தக்கது. தேர்தல் பறக்கும் படை அதிகாரிகள் தொடர்ந்து தீவிர சோதனையில் ஈடுபட்டு வருகின்றனர்.