திருப்பூரில் ஆயுதபூஜை கொண்டாட்டம்: பனியன் நிறுவனங்கள் தூய்மைப் பணிகளில் தீவிரம்

திருப்பூர்: திருப்பூர் தொழில் நகரத்தில் ஆயுதபூஜை பண்டிகையை முன்னிட்டு பனியன் நிறுவனங்கள் தூய்மைப் பணிகளில் தீவிரமாக ஈடுபட்டு வருகின்றன. இதனால் நாளை நடைபெறவுள்ள ஆயுதபூஜை கொண்டாட்டங்களுக்கான ஏற்பாடுகள் மும்முரமாக நடைபெற்று வருகின்றன.



திருப்பூரில் உள்ள பின்லாடை நிறுவனங்கள் தங்களது இயந்திரங்கள் மற்றும் நிறுவனங்களை தூய்மைப்படுத்தும் பணியில் தீவிரமாக ஈடுபட்டுள்ளனர். அதேபோன்று தங்களது வாகனங்களையும் சுத்தம் செய்து வருகின்றனர். பனியன் உற்பத்தி மற்றும் அது சார்ந்த தொழிற்கூடங்களில் உற்பத்தி நிறுத்தப்பட்டு, இயந்திரங்கள் தூய்மை செய்யப்பட்டு சிறப்பாக பூஜைகள் செய்யப்படவுள்ளன.



ஆயுதபூஜைக்கு தேவையான பூக்கள் உள்ளிட்ட பொருட்களை வாங்க திருப்பூர் மாநகராட்சி தினசரி பூ மார்கெட்டில் பொதுமக்கள் கூட்டம் அதிகரித்து காணப்பட்டது.



பண்டிகையை முன்னிட்டு பூக்களின் விலை அதிகரித்துள்ளது. மல்லி கிலோ 800 முதல் 1000 ரூபாய் வரையிலும், முல்லை கிலோ 600 ரூபாய்க்கும், செவ்வந்தி கிலோ 250 லிருந்து 300 ரூபாய் வரையிலும், சம்பங்கி கிலோ 300 ரூபாய்க்கும், செவ்வரளி கிலோ 500 ரூபாய்க்கும் விற்பனையாகின்றன.

மேலும் பூஜைக்கு தேவையான வாழைக்கன்று, பொரி, பழங்கள் உள்ளிட்ட பிற பொருட்களின் விலையும் சற்று அதிகரித்தே காணப்பட்டது. விலை அதிகம் என்றாலும் பொதுமக்கள் பூஜைக்கு தேவையான பொருட்களை வாங்கிச் சென்றனர்.



பூ மார்கெட்டில் கூட்டம் அதிகரித்து காணப்பட்டதால் குமரன் சாலை, தென்னம்பாளையம் உள்ளிட்ட பகுதிகளில் போக்குவரத்து நெரிசல் ஏற்பட்டது.



இவ்வாறாக திருப்பூரில் ஆயுதபூஜை கொண்டாட்டத்திற்கான ஏற்பாடுகள் தீவிரமாக நடைபெற்று வருகின்றன.