வால்பாறை: கனமழையில் நியாய விலைக் கடையில் பொருட்கள் வாங்க மக்கள் அவதி

Coimbatore: வால்பாறையில் கனமழை பெய்து வரும் நிலையில், நியாய விலைக் கடைகளில் பொருட்கள் வாங்குவதற்கு மக்கள் பெரும் சிரமத்திற்கு உள்ளாகி வருகின்றனர். குறிப்பாக, 12வது வார்டுக்குட்பட்ட கருமலை எஸ்டேட் பகுதியில் உள்ள நியாய விலைக் கடையில் மக்கள் கொட்டும் மழையில் வெளியே நின்று பொருட்களை வாங்க வேண்டிய நிலை ஏற்பட்டுள்ளது.

வால்பாறையில் 65க்கும் மேற்பட்ட எஸ்டேட் பகுதிகள் உள்ளன. இங்கு 70க்கும் மேற்பட்ட மகளிர் சுய உதவிக் குழுக்கள் மூலம் நியாய விலைக் கடைகள் இயங்கி வருகின்றன. மேலும், சிந்தாமணி நியாய விலைக் கடைகளும் செயல்பட்டு வருகின்றன. பல எஸ்டேட் பகுதிகளில் எஸ்டேட் நிர்வாகத்தின் இடங்களில் நியாய விலைக் கடைகள் இயங்கி வருகின்றன. வால்பாறை, முடிஸ், சோலையார் அணை, ரொட்டிக்கடை போன்ற பகுதிகளில் அரசு கட்டிடங்களில் நியாய விலைக் கடைகள் செயல்பட்டு வருகின்றன.

தற்போது வால்பாறை பகுதிகளில் கனமழை பெய்து வருவதால், குறிப்பாக கருமலை எஸ்டேட் பகுதியில் உள்ள நியாய விலைக் கடையில் மழைநீர் உள்ளே வடிகிறது. இதனால் உணவுப் பொருட்கள் சேதமடைகின்றன. மேலும், மக்கள் கொட்டும் மழையில் வெளியே நின்று பொருட்களை வாங்க வேண்டிய நிலை ஏற்பட்டுள்ளது. இந்நிலையில், கருமலை எஸ்டேட் பகுதியில் உள்ள நியாய விலைக் கடையை அரசு கட்டிடத்தில் அமைத்துத் தருமாறு அப்பகுதி மக்கள் கோரிக்கை விடுத்துள்ளனர்.