News

பட்டியலினத்தவரை துணை முதல்வராக்க வேண்டும்: வானதி சீனிவாசன் வலியுறுத்தல்

SimpliCity News Team · 27 Sept 2024

Coimbatore: கோவை தெற்கு சட்டமன்ற உறுப்பினர் வானதி சீனிவாசன் தனது முகநூல் பக்கத்தில் வெளியிட்டுள்ள பதிவில், முதலமைச்சர் மு.க.ஸ்டாலின் பட்டியலினத்தவரை துணை முதல்வராக்கி சமூக நீதியை நிலைநாட்ட வேண்டும் என்று வலியுறுத்தியுள்ளார்.

திமுகவின் கூட்டணி நடைமுறைகளை விமர்சித்த வானதி சீனிவாசன், "கூட்டணி இல்லாமல் தேர்தலில் போட்டியிடவே அச்சம் கொள்ளும் திமுக, கூட்டணி இல்லாமல் வெற்றி பெறவே முடியாத திமுக, கூட்டணி கட்சிகள் தயவில் வெற்றி பெற்றதும், தனித்து ஆட்சி அமைக்கும்" என்று குற்றம்சாட்டியுள்ளார்.

திமுக அரசின் அமைச்சரவையில் பட்டியலினத்தவருக்கு முக்கியத்துவம் இல்லை என்றும், 34 பேர் கொண்ட அமைச்சரவையில் பட்டியலினத்தைச் சேர்ந்த அமைச்சர்களுக்கு கடைசி இடங்களே வழங்கப்பட்டுள்ளதாகவும் வானதி சீனிவாசன் சுட்டிக்காட்டியுள்ளார்.

மேலும், திமுக ஆட்சிக்கு வந்த 6 முறைகளிலும் வலுவான கூட்டணி அமைத்துதான் வென்றதாகவும், ஆனால் கூட்டணி கட்சிகளுக்கு அமைச்சரவையில் பங்கு தரவில்லை என்றும் அவர் குறிப்பிட்டுள்ளார்.

"கூட்டணி இல்லாமல் இதுவரை தேர்தலை சந்திக்க கூட துணிவில்லாத திமுக, ஆட்சிக்கு வந்ததும் கூட்டணி கட்சிகளை துச்சமென மதிக்கிறது. கறிவேப்பிலையைப் போல தேர்தலின்போது பயன்படுத்திக் கொண்டு, தேர்தல் முடிந்து ஆட்சி அதிகாரம் கைக்கு வந்ததும் தூக்கி வீசி விடுகிறது," என்று வானதி சீனிவாசன் கடுமையாக விமர்சித்துள்ளார்.

இறுதியாக, விடுதலைச் சிறுத்தைகள் கட்சியின் தலைவர் திருமாவளவன் முன்வைத்துள்ள 'ஆட்சியிலும் பங்கு; அதிகாரத்திலும் பங்கு' என்ற கோரிக்கையை ஆதரித்து, திமுகவின் கூட்டணி நடைமுறைகளில் மாற்றம் தேவை என்று வானதி சீனிவாசன் வலியுறுத்தியுள்ளார்.

vanathi srinivasan dmk alliance social justice deputy cm scheduled caste mk stalin

பட்டியலினத்தவரை துணை முதல்வராக்க வேண்டும்: வானதி சீனிவாசன் வலியுறுத்தல்

Related stories