பொள்ளாச்சியில் மாடன் ரைஸ் மில் சுற்றுச்சுவர் இடிந்து விழுந்தது - எம்எல்ஏ ஜெயராமன் நேரில் ஆய்வு

கோவை: பொள்ளாச்சி மற்றும் சுற்றுவட்டார பகுதிகளில் தென்மேற்கு பருவமழை பரவலாக பெய்து வருகிறது. இதன் காரணமாக பல்வேறு இடங்களில் சுவர்கள் மற்றும் வீடுகள் இடிந்து சேதமடைந்து வருகின்றன.



இந்நிலையில், பொள்ளாச்சி டீச்சர்ஸ் காலனி பகுதியில் உள்ள மாடன் ரைஸ் மில் சுற்றுச்சுவர் இன்று மாலை இடிந்து விழுந்தது. இதனால் அருகிலுள்ள வீடுகளும் சிறிய அளவில் சேதமடைந்தன. ஆனால், அதிர்ஷ்டவசமாக வீடுகளில் யாரும் இல்லாததால் பெரிய உயிர்ச்சேதம் ஏற்படவில்லை.



இச்சம்பவம் குறித்து தகவல் அறிந்த பொள்ளாச்சி சட்டமன்ற உறுப்பினர் ஜெயராமன், சம்பவ இடத்திற்கு நேரில் சென்று ஆய்வு மேற்கொண்டார். அப்போது அவர் மாடன் ரைஸ் மில் அதிகாரிகளை சந்தித்து, இடிந்து விழுந்த சுற்றுச்சுவரை மீண்டும் கட்டுவதற்கான நடவடிக்கைகளை விரைவாக மேற்கொள்ளுமாறு கேட்டுக்கொண்டார்.

தொடர்ந்து பெய்து வரும் கனமழையின் காரணமாக பொள்ளாச்சி பகுதியில் பல இடங்களில் இது போன்ற சம்பவங்கள் நடந்து வருவதால், பொதுமக்கள் மிகவும் கவனமாக இருக்குமாறு அதிகாரிகள் அறிவுறுத்தியுள்ளனர். மேலும், பழுதடைந்த கட்டிடங்கள் மற்றும் சுவர்களை உடனடியாக சரி செய்யுமாறு உரிமையாளர்களுக்கு அறிவுறுத்தப்பட்டுள்ளது.