MyV3 நிறுவனத்திற்கு எதிரான அவதூறு: கோவை பாமக நிர்வாகி மீது நடவடிக்கை கோரி மாவட்ட ஆட்சியரிடம் மனு

கோவை: கோவை மாவட்ட ஆட்சியர் அலுவலகத்தில் MyV3 நிறுவனத்தின் பயன்பாட்டாளர்கள் ஒரு முக்கியமான மனுவை சமர்ப்பித்துள்ளனர். பாட்டாளி மக்கள் கட்சியை (பாமக) சேர்ந்த அசோக் ஸ்ரீநிதி என்பவர் MyV3 நிறுவனத்திற்கு எதிராக தொடர்ந்து அவதூறு பரப்பி வருவதாக குற்றம் சாட்டி, அவர் மீது நடவடிக்கை எடுக்க வேண்டும் என்று கோரியுள்ளனர்.



மனுவில் கூறப்பட்டுள்ள விவரங்களின்படி, MyV3 நிறுவனத்தின் மூலம் பயனாளிகள் தேவையான பொருட்களை வாங்கி, மாதந்தோறும் ஒரு குறிப்பிட்ட தொகையை சம்பாதித்து வந்துள்ளனர். ஆனால் KYC புதுப்பித்தல் மற்றும் தேர்தல் நடத்தை விதிமுறைகள் காரணமாக வருமானம் தற்காலிகமாக நிறுத்தப்பட்டது. பின்னர் ஜூன் மாதம் முதல் மீண்டும் வருமானம் கிடைக்கத் தொடங்கியது.

ஆனால், நிறுவனத்தின் மீதும் நிர்வாக இயக்குனரின் மீதும் பொய்யான வழக்கு பதிவு செய்யப்பட்டதால், வருமானம் ஈட்டுவதில் மீண்டும் சிக்கல் ஏற்பட்டுள்ளதாக பயனாளிகள் குறிப்பிட்டுள்ளனர். மேலும், பாமக நிர்வாகி அசோக் ஸ்ரீநிதி தொடர்ந்து MyV3 நிறுவனத்தின் மீது அவதூறுகளை பரப்பி வருவதாகவும் குற்றம் சாட்டியுள்ளனர்.



இந்த அவதூறு பிரச்சாரம் காரணமாக சுமார் 75 லட்சம் பயனாளர்களின் வாழ்வாதாரம் கேள்விக்குறியாகியுள்ளதாக மனுவில் தெரிவிக்கப்பட்டுள்ளது. எனவே, அசோக் ஸ்ரீநிதி மீது உரிய நடவடிக்கை எடுத்து, பயனாளிகளின் வாழ்வாதாரத்தை பாதுகாக்க வேண்டும் என்று மாவட்ட ஆட்சியரிடம் வேண்டுகோள் விடுத்துள்ளனர்.