முதலமைச்சர் மு.க.ஸ்டாலினின் 70வது பிறந்தநாளைக் கொண்டாடும் விதமாக கோவை அவினாசி சாலையில் தனியார் அரங்கில் திமுக சார்பில் 70 ஜோடிகளுக்கு திருமணம் நடத்தி வைக்கப்பட்டது. இதில் அமைச்சர் உதயநிதி ஸ்டாலின் கலந்துகொண்டு தாலியை எடுத்துக் கொடுத்து திருமணத்தை நடத்தி வைத்தார்.
கோவை: முதல்வர் மு.க.ஸ்டாலின் பிறந்த நாளை முன்னிட்டு கோவை மாவட்ட திமுக சார்பில் 70வது ஜோடிகளுக்குத் திருமணம் செய்து வைக்கப்பட்டது.
தமிழ்நாடு முதலமைச்சரும், திமுக தலைவருமானமு.க.ஸ்டாலினின் 70வது பிறந்தநாளை தமிழகம் முழுவதும் திமுகவினர் கொண்டாடி வருகின்றனர். இந்நிலையில் முதலமைச்சர் கூறியது போல, ஏழை எளிய மக்களுக்கு உதவுகின்ற வகையில் பிறந்தநாள் கொண்டாட்டம் கொண்டாடப்பட்டு வருகிறது.
அதன் ஒரு பகுதியாக ஒருங்கிணைந்த கோவை மாவட்ட திமுக சார்பில் 70வது ஜோடிகளுக்கு திருமணம் நடத்தி வைக்கப்பட்டது. கோவை - அவினாசி சாலையில் உள்ள தனியார் அரங்கில் நடைபெற்ற இந்த நிகழ்ச்சியில் இளைஞர் நலன் மற்றும் விளையாட்டுத் துறை அமைச்சர் உதயநிதி ஸ்டாலின் கலந்துகொண்டு தாலியை எடுத்துக் கொடுத்து திருமணத்தை நடத்தி வைத்தார்.
புதுமண தம்பதிகள் மற்றும் உறவினர்களுடன் தனித்தனியாகப் புகைப்படங்கள் எடுத்துக் கொண்டு புதுமண தம்பதிகளுக்கு ஸ்மார்ட் வாட்ச்சை பரிசாக அளித்தார்.
மேலும் 70 ஜோடிகளுக்கும் கல்யாண சீர் வரிசைகள் மற்றும் டிவி, மிக்சி, குளிர்சாதனப் பெட்டி, நாற்காலிகள் மற்றும் மின்சார அடுப்பு உள்ளிட்டவை வழங்கப்பட்டன.
இந்த நிகழ்வில் மின்சாரத்துறை அமைச்சர் செந்தில் பாலாஜி உட்பட ஒருங்கிணைந்த கோவை மாவட்ட திமுக நிர்வாகிகள் பலரும் கலந்து கொண்டனர்.