வால்பாறைக்கு வரும் சுற்றுலா பயணிகள், வனப்பகுதிகளுக்கு அத்துமீறி சென்று ஆபத்தை உணராமல் யானைகளின் அருகே செல்பி எடுக்கும் சம்பவங்களை தடுக்க வனத்துறை உடனடியாக நடவடிக்கை எடுக்க வேண்டும் என வன ஆர்வலர்கள் வலியுறுத்தல்.
கோவை: வால்பாறை சுற்றுவட்டார எஸ்டேட் பகுதிகளில் கடந்த சில ஆண்டுகளாக யானைகள் நடமாட்டம் தொடர்ந்து அதிகரித்து வருகிறது. காட்டு யானைகள் கூட்டமாகவும் தனியாகவும் குட்டியிடனும் தேயிலைதோட்ட பகுதியில் ஆங்காங்கேசுற்றித் திரிந்து வருகின்றன.
இந்நிலையில், யானைகளை பார்ப்பதற்காகசுற்றுலா பயணிகள் வனப் பகுதிகளுக்குள் அத்துமீறி சென்று வருவதாக குற்றச்சாட்டுகள் எழுந்துள்ளன. அவ்வாறு அத்துமீறி செல்லும் சுற்றுலா பயணிகள் ஆபத்தை உணராமல், யானைகளை புகைப்படம் எடுப்பது மட்டுமல்லாமல் செல்பியும், எடுத்து கொள்கிறார்கள். இதன் காரணமாக யானை - மனித மோதல் ஏற்படும் என்ற அச்சத்தில் சமூக ஆர்வலர்கள் கவலை அடைந்துள்ளனர்.
இந்நிலையில் வால்பாறை அடுத்த கூழாங்கல் ஆற்றின் அருகேயுள்ள வனப்பகுதியில் சுமார்10 நாட்களாக12 காட்டு யானைகள் சிறிய வனப்பகுதியில் முகாமிட்டுள்ளது.யானைகள் தண்ணீர் குடிப்பதற்காக சாலையைக் கடந்து தேயிலைத் தோட்டம் வழியாக கூழாங்கல் ஆற்றில் தண்ணீர் குடித்துவிட்டு மீண்டும் வனப்பகுதிக்கு செல்கிறது.
இதையறிந்த சுற்றுலாப் பயணிகளும் வால்பாறையில் உள்ள சுற்றுலா கைடுகளும் யானை இருக்கும் இடத்தை அறிந்து ஆபத்தை உணராமல் யானை அருகே சென்று புகைப்படம் எடுக்கவும் செல்பி எடுக்கவும் செல்கின்றனர்.
இந்நிலையில், அப்பகுதியில் வனத்துறையினர் பாதுகாப்பு பணியில் ஈடுபடாததன் காரணமாக சுற்றுலா பயணிகளை தடுக்க முடியவில்லை என அப்பகுதி மக்கள் தெரிவிக்கின்றனர்.
மேலும் யானைகள் நடமாட்டம் அதிகரித்து வருவதால் வனவிலங்கு - மனித மோதலை தடுப்பதற்கு வனத்துறை உடனடியாக நடவடிக்கை எடுக்க வேண்டும் என வன ஆர்வலர்கள் கோரிக்கை விடுத்துள்ளனர்.