கோவையில் களைகட்டியது ஆயுத பூஜை..! பூக்கள் விலை கிடுகிடு உயர்வு

கோவை: நாளை கொண்டாடப்பட உள்ள ஆயுத பூஜையை முன்னிட்டு, கோவை பூ மார்க்கெட் பகுதியில் ஆயிரக்கணக்கான மக்கள் குவிந்தனர். தொழிற்சாலைகள் மற்றும் வீடுகளுக்கு மொத்தமாகவும் சில்லரையாகவும் பூக்களை வாங்க மக்கள் குவிந்ததால் அப்பகுதி முழுவதும் திருவிழாக்காலம் பூண்டது.

கடந்த இரண்டு ஆண்டுகளாக கொரோனா தொற்றால் கலை இழந்து காணப்பட்ட ஆயுத பூஜை மற்றும் சரஸ்வதி பூஜை திருவிழாக்களை இவ்வாண்டு கோலாகலமாக கொண்டாட பொதுமக்கள் ஆர்வம் காட்டி வருகின்றனர்.

அதன்படி, பூஜைக்கு தேவையான பொருட்களான பொரி, பூ, ஊதுபத்தி, வாழை இலை, வாழை தோரணங்கள், தொழிற்சாலைகளை அலங்காரப்படுத்த கலர் பேப்பர்கள், போன்ற பல்வேறு பொருட்களை வாங்க கோவை பூ மார்க்கெட் பகுதியில் மக்கள் குவிந்து வருகின்றனர்.

நவராத்திரி விழாவை முன்னிட்டு கடந்த இரண்டு வாரங்களாகவே பூக்களின் விலை உயர்ந்து காணப்பட்ட நிலையில், நாளை கொண்டாடப்பட உள்ள ஆயுத பூஜையை முன்னிட்டு பூக்களின் விலை ரூபாய் ஆயிரம் வரை விற்கப்பட்டு வருகிறது.

அதன்படி மல்லி ஒரு கிலோ ரூ.800 முதல் 1000 வரை விற்பனையானது. ஜாதி மல்லி ரூ.600, செவ்வந்தி ரூ.400, ரோஜா ஒரு கிலோ ரூ.320, அரளி ரூ.300, தாமரை ஒன்று ரூ.20, கோழிக் கொண்டை பூ ரூ.100, மருகு ஒரு கட்டு ரூ.30, மரிகொழுந்து ஒரு கட்டு ரூ.30, நந்தியா வட்டம் ரூ.200, சம்பங்கி ரூ.30, செண்டுமல்லி ரூ.100, வாடாமல்லி ரூ.100, பனை ஓலை ஒன்று ரூ.5, வாழை குலை ஒன்று ரூ.20, எலுமிச்சை ஒரு கிலோ ரூ.160- ஆக அதிகரித்து இருந்தது.

அதேபோன்று வெள்ளை பூசனி ஒரு கிலோ ரூ.40, தேங்காய் ரூ.15 முதல் 30 வரையும், சாத்துகுடி ரூ.100, ஆரஞ்சு ரூ.150, மாதுளை ரூ.220, ஆப்பிள் ரூ.150, திராட்சை ரூ.120, கொய்யா ரூ.100-க்கும் விற்பனையானது.

விலை உயர்வை பொருட்படுத்தாமல் மக்கள் சில்லறையாகவும், மொத்தமாகவும் பூக்கள் மற்றும் பூஜை சாமான்களை வாங்கி செல்வதால் வியாபாரிகள் மகிழ்ச்சி அடைந்துள்ளனர்.