போளுவாம்பட்டி - தொண்டாமுத்தூர் இடையே உள்ள தென்னமநல்லூர் அருகே வந்த போது, கார் கட்டுப்பாட்டை இழந்து அங்கிருந்த தோட்டத்தின் கேட்டை உடைத்துக்கொண்டு கிணற்றில் பாய்ந்தது. அதில், ஒருவர் தப்பித்த நிலையில், மூவர் பலியாகினர். இறந்தவர்களின் உடலை மீட்கும் பணியில் தீயணைப்பு வீரர்கள் ஈடுபட்டு வருகின்றனர்.
கோவை வடவள்ளி பகுதியைச் சேர்ந்த ரோஷன் (18) நேற்று ஓணம் பண்டிகையை முன்னிட்டு தனது உறவினர் காரில் நண்பர்களான வடவள்ளி பகுதியை சேர்ந்த ஆதேஷ், ரவி, நந்தனன் உள்ளிட்டவர்களுடன் கோவை சிறுவாணி சாலையில் உள்ள செலிபிரிட்டி என்ற தனியார் கிளப்பில் பண்டிகையை கொண்டாட சென்றுள்ளார்.
அப்போது, கிளப்பில் ஓணம் பண்டிகை கொண்டாட்டத்தில் ஈடுபட்ட நான்கு இளைஞர்களும் நேற்று இரவு அங்கேயே தங்கியுள்ளனர். பின்னர், இன்று காலை 6 மணி மணியளவில் அங்கிருந்து வீட்டிற்கு புறப்பட்டுள்ளார். காரில் அதிவேகமாக பயணித்ததாக கூறப்படும் நிலையில், போளுவாம்பட்டி - தொண்டாமுத்தூர் இடையே உள்ள தென்னமநல்லூர் அருகே அவர்களது கார் வந்த போது, அப்பகுதியிலுள்ள பழனிசாமி என்பவருக்கு சொந்தமான தோட்டத்தின் இரும்பு கேட்டை உடைத்து கொண்டு உள்ளே புகுந்த கார், அங்கிருந்த 120 அடி ஆழ கிணற்றுக்குள் கண்ணிமைக்கும் நேரத்தில் விழுந்து விபத்துக்குள்ளானது.
கிணற்றில் 50 அடிக்கும் மேல் தண்ணீர் இருந்ததால், நான்கு பேரும் உயிருக்கு போராடினர். அப்போது, காரை ஓட்டிய ரோஷன் என்பவர் காரின் கதவை திறந்து கிணற்றுக்கு மேலே வந்தார். அதே சமயத்தில், அவரது மூன்று நண்பர்களும் நீரில் மூழ்கியுள்ளனர்.
விபத்தில் தப்பித்த ரோஷன் அளித்த தகவலின் பெயரில், சம்பவ இடத்திற்கு விரைந்த காவல்துறையினர் மற்றும் தீயணைப்பு துறையினர், கிணற்றில் இருந்த காரை மற்றும் உயிரிழந்தவர்களை மீட்கும் முயற்சியில் ஈடுபட்டுள்ளனர்.
கிணற்றில் தண்ணீர் அதிகம் இருப்பதனால், நீரை பம்புகள் கொண்டு வெளியேற்றும் பணியில் தீயணைப்பு துறையினர் மற்றும் அப்பகுதி கிராம மக்கள் ஈடுபட்டு வருகின்றனர். நீரில் மூழ்கிய மூன்று மாணவர்களின் உடலை மீட்க கிராம மக்களின் உதவியுடன் தீயணைப்பு துறையினர் போராடி வருகின்றனர்.
சம்பவம் குறித்து வழக்குப் பதிவு செய்துள்ள தொண்டாமுத்தூர் காவல் நிலைய போலீசார் தீவிர விசாரணையில் ஈடுபட்டுள்ளனர். நண்பர்களுடன் ஓணம் கொண்டாட்டத்தில் ஈடுபட்டு விட்டு, வீடு திரும்பிய கல்லூரி மாணவர்கள் விபத்துக்குள்ளான சம்பவம் அவர்களது குடும்பத்தாரிடையே பெரும் சோகத்தை ஏற்படுத்தியுள்ளது.
