தேமுதிக தலைவர் விஜயகாந்தின் 70வது பிறந்தநாளையொட்டி, கட்சியினர் அவர் உடல்நலம் பெற வேண்டி, புலியகுளம் விநாயகர் கோவில், அந்தோனியார் தேவாலயம் மற்றும் தர்காவில் சிறப்பு பிரார்த்தனையில் ஈடுபட்டனர்.
கோவை: நடிகரும், தேமுதிக தலைவருமான விஜயகாந்தின் 70வது பிறந்த நாளை தமிழகம் முழுவதும் உள்ள கட்சி தொண்டர்கள் மற்றும் அவரது ரசிகர்கள் வெகு விமரிசையாக கொண்டாடி வருகின்றனர்.
கோவை மாவட்ட தேமுதிகவினர் அவரது பிறந்தநாளை கொண்டாடும் விதமாக, காய்கடை மைதானத்தின் அருகில் உள்ள தேமுதிக கட்சியின் மாவட்ட தலைமை அலுவலகத்தில் கட்சிக் கொடி ஏற்றப்பட்டு கேக் வெட்டி கொண்டாடி பொதுமக்களுக்கு இனிப்புகளை வழங்கினர்.
இதையடுத்து, அவர் உடல்நலம் பெற புலியகுளம் பெரிய விநாயகர் கோவிலில் சிறப்பு பூஜைகள் செய்து வழிபட்டனர்.
பின்னர், அதே பகுதியில் அமைந்துள்ள அந்தோணியார் தேவாலயத்தில் மெழுகுவர்த்தி ஏந்தி சிறப்பு பிரார்த்தனையில் ஈடுபட்டனர்.
இதனையடுத்து, திருச்சி சாலையில் உள்ள தர்காவில் கேப்டன் விஜயகாந்த் பிறந்தநாளையொட்டி சிறப்பு தொழுகையும் நடத்தப்பட்டது.
இந்த நிகழ்ச்சிகளில், கோவை மாநகர தேமுதிக மாவட்ட செயலாளர் சிங்கை சந்துரு, மாநில சட்ட ஆலோசகர், முருகராஜ் மற்றும் மாவட்ட பொருளாளர், ராகவலிங்கம் உள்ளிட்ட ஏராளமானோர் கலந்து கொண்டனர்.