காமன்வெல்த் போட்டியில் தங்கம் வென்றார் பஜ்ரங் புனியா

காமன்வெல்த் தொடரின் மல்யுத்தப் போட்டி 65 கிலோ எடைப்பிரிவில், இந்தியாவின் பஜ்ரங் புனியா தங்கப்பதக்கம் வென்றார்.

காமன்வெல்த் விளையாட்டுப் போட்டிகள் ஆஸ்திரேலியாவின் கோல்டுகோஸ்ட் நகரில் நடைபெற்று வருகிறது. இதில், இந்திய வீரர்கள் தொடர்ந்து பதக்கங்களைக் குவித்து வருகின்றனர். இன்று துப்பாக்கி சுடுதல் பிரிவில் இரண்டு தங்கம் கிடைத்தது. மகளிருக்கான 50 மீ ரைபிள் துப்பாக்கி சுடுதல் போட்டியில் இந்தியாவின் தேஜஸ்வினி சவாந்த் தங்கப் பதக்கம் வென்றார். ஆடவருக்கான 25 மீட்டர் ரேபிட் பயர் பிஸ்டல் துப்பாக்கி சுடுதல் போட்டியில் அனிஷ் பன்வாலா தங்கம் வென்று அசத்தினார். 

இதைத் தொடர்ந்து, மல்யுத்தப் போட்டியிலும் இந்திய வீரர், வீராங்கனைகள் ஆதிக்கம் செலுத்தினர். ஆடவர் 65 கிலோ எடைப்பிரிவினருக்கான மல்யுத்தப்போட்டியில் இந்திய வீரர் பஜ்ரங் புனியா தங்கப்பதக்கம் வென்று அசத்தினார். மகளிருக்கான 57 கிலோ எடைப்பிரிவின் மல்யுத்த போட்டியில் இந்திய வீராங்கனை பூஜா தண்டா வெள்ளிப்பதக்கம் வென்றார். மகளிருக்கான 68 கிலோ எடைப்பிரிவின் மல்யுத்த போட்டியில் மற்றொரு இந்திய வீராங்கனையான திவ்யா காக்ரன் வெண்கலப்பதக்கம் வென்றார்.

இந்நிலையில், ஆடவருக்கான 97 கிலோ எடைப்பிரிவின் மல்யுத்த போட்டியில் இந்திய வீரர் மவுசம் கட்ரி வெள்ளிப்பதக்கம் வென்றார். தங்கப்பதக்கத்தை தென்ஆப்ரிக்க வீரர் மார்டின் எராஸ்மஸ் தட்டிச் சென்றார். இதுவரை இந்தியா 17 தங்கம், 10 வெள்ளி, 12 வெண்கலம் என மொத்தம் 39 பதக்கங்களுடன் பதக்க பட்டியலில் மூன்றாம் இடத்தில் நீடிக்கிறது. 64 தங்கம் வென்ற ஆஸ்திரேலியா தொடர்ந்து முதலிடத்தைத் தக்க வைத்துள்ளது. 29 தங்கப் பதக்கங்களுடன் இங்கிலாந்து இரண்டாம் இடத்தில் உள்ளது.