இங்., எதிரான ஆஷஸ் கடைசி டெஸ்ட்டிலும் ஆஸி., வெற்றி: 4-0 என்ற கணக்கில் தொடரையும் கைப்பற்றியது

ஜனவரி 8

இங்கிலாந்துக்கு எதிரான ஆஷஸ் டெஸ்ட் தொடரின் கடைசி போட்டியில் ஆஸ்திரேலிய அணி இன்னிங்ஸ் மற்றும் 123 ரன்கள் வித்தியாசத்தில் வெற்றி பெற்று தொடரைக் கைப்பற்றி உள்ளது.

ஆஸ்திரேலியா- இங்கிலாந்து அணிகள் இடையிலான ஆஷஸ் தொடரின் 5-வது மற்றும் கடைசி டெஸ்ட் போட்டி சிட்னியில் நடைபெற்றது. இங்கிலாந்து முதல் இன்னிங்சில் 346 ரன் குவித்தது. அதிகபட்சமாக கேப்டன் ரூட் 83 ரன்கள் எடுத்தார். பின்னர் முதல் இன்னிங்சை விளையாடிய ஆஸ்திரேலிய அணியின் பேட்ஸ்மேன்கள், உஸ்மான் கவாஜா (171), ஷான் மார்ஷ் (156), மிட்செல் மார்ஷ் (101) சதம் அடித்து கைகொடுக்க, 4-ம் நாள் ஆட்டத்தின்போது ஆஸ்திரேலிய அணி 7 விக்கெட் இழப்புக்கு 649 ரன் குவித்து டிக்ளேர் செய்தது. 

பின்னர், 303 ரன்கள் பின்தங்கிய நிலையில் 2-வது இன்னிங்சை தொடங்கிய இங்கிலாந்து அணி ஆரம்பத்திலேயே தடுமாறியது. ஸ்டோன்மேன் ரன் எதுவும் எடுக்காமல் அவுட் ஆனார். குக் 10 ரன்களும், வின்ஸ் 18 ரன்களும், தாவித் மலன் 5 ரன்களும் எடுத்து ஆட்டமிழந்தனர். இதனால் 4-வது நாள் ஆட்ட முடிவில் 4 விக்கெட் இழப்பிற்கு 93 ரன்கள் எடுத்திருந்தது. ஜோ ரூட் 42 ரன்னுடனும், பேர்ஸ்டோவ் 17 ரன்னுடனும் களத்தில் இருந்தனர்.

இந்த நிலையில், இன்று கடைசி நாள் ஆட்டம் நடைபெற்றது. தொடர்ந்து ஆடிய ஜோ ரூட் 58 ரன்கள் எடுத்திருந்த நிலையில் உடல்நலக்குறைவு காரணமாக ஆட்டத்திலிருந்து பாதியில் விலகினார். அதன்பின் வந்த வீரர்களும் நிலைக்கவில்லை. மொயீன் அலி (13), பேர்ஸ்டோவ் (38), பிராட் (4), கிரேன் (2), ஆண்டர்சன் (2) ஆகியோர் வந்த வேகத்தில் பெவிலியன் திரும்ப, இங்கிலாந்து அணி 180 ரன்களில் சுருண்டது. குரன் 23 ரன்கள் எடுத்து ஆட்டமிழக்காமல் இருந்தார். 

இதன்மூலம், ஆஸ்திரேலிய அணி இன்னிங்ஸ் மற்றும் 123 ரன்கள் வித்தியாசத்தில் அபார வெற்றி பெற்றது. கம்மின்ஸ் 4 விக்கெட்டும், லியான் 3 விக்கெட்டும், ஸ்டார்க், ஹசில்வுட் ஆகியோர் தலா ஒரு விக்கெட்டையும் கைப்பற்றினர். இந்தப் போட்டியில் வெற்றி பெற்றதன் மூலம், 5 போட்டிகள் கொண்ட டெஸ்ட் தொடரை 4-0 என்ற கணக்கில் கைப்பற்றியது. பேட் கம்மின்சுக்கு ஆட்டநாயகன் விருதும், ஸ்டீவன் ஸ்மித்துக்கு தொடர் நாயகன் விருதும் வழங்கப்பட்டது.