இலங்கை அணிக்கு எதிரான தொடரை வெல்லுமா இந்தியா..? நாளை கடைசி ஒருநாள் போட்டி

டிசம்பர் 16

இந்தியா - இலங்கை அணிகள் மோதும் 3-வது மற்றும் கடைசி ஒருநாள் போட்டி விசாகப்பட்டினத்தில் நாளை நடக்கிறது. இந்தப் போட்டியில் வெற்றி பெற்று இந்திய அணி தொடரை வெல்லுமா? என ரசிகர்கள் ஆவலுடன் எதிர்பார்த்துள்ளனர். 

இலங்கை கிரிக்கெட் அணி இந்தியாவில் சுற்றுப்பயணம் செய்து விளையாடி வருகிறது. இரு அணிகள் இடையேயான 3 டெஸ்ட் கொண்ட தொடரை இந்தியா 1-0 என்ற கணக்கில் கைப்பற்றியது. இதைத் தொடர்ந்து நடந்த இரு அணிகள் இடையேயான 3 ஒருநாள் போட்டிகள் கொண்ட தொடரின், முதல் ஆட்டத்தில் 7 விக்கெட் வித்தியாசத்தில் இலங்கை வெற்றி பெற்றது. மொகாலியில் நடந்த 2-வது போட்டியில் இந்தியா 141 ரன் வித்தியாசத்தில் அபார வெற்றி பெற்றது. இதனால் தொடர் 1-1 என்ற கணக்கில் சமநிலையில் உள்ளது.

இந்த நிலையில், இந்தியா - இலங்கை அணிகள் மோதும் 3-வது மற்றும் கடைசி ஒருநாள் போட்டி ஆந்திர மாநிலம் விசாகப்பட்டினத்தில் நாளை (17-ந்தேதி) நடக்கிறது. மொகாலி போட்டியைப் போல இந்த ஆட்டத்திலும் இந்திய அணி அதிரடியாக விளையாடி தொடரை வெல்லுமா? என ரசிகர்கள் ஆவலுடன் எதிர்பார்த்துள்ளனர். 

தொடர்ச்சியாக 8-வது ஒருநாள் தொடரை வெல்லும் வேட்கையில் ரோகித்சர்மா தலைமையிலான இந்திய அணி உள்ளது. இதேபோல, டெஸ்ட் தொடரை இழந்த இலங்கை அணி ஒருநாள் தொடரையாவது கைப்பற்றி விட வேண்டும் என்ற ஆர்வத்தில் உள்ளது. இரு அணிகளும் வெற்றிக்காகக் கடுமையாக போராடுவார்கள் என்பதால் இந்த ஆட்டம் விறுவிறுப்பாக இருக்கும் என்று எதிர்பார்க்கப்படுகிறது.

இரு அணிகளும் இதுவரை 157 ஆட்டத்தில் மோதியுள்ளன. இந்தியா 89-ல், இலங்கை 56-ல் வெற்றி பெற்றுள்ளன. ஒரு போட்டி ‘டை’யில் முடிந்தது. 11 ஆட்டம் ‘டிரா’ ஆனது. நாளை போட்டி காலை 11.30 மணிக்குத் தொடங்குகிறது. ஸ்டார் ஸ்போர்ட்ஸ் டெலிவிசனில் இந்த ஆட்டம் நேரடியாக ஒளிபரப்பு செய்யப்படுகிறது.

இந்தியா: ரோகித்சர்மா (கேப்டன்), தவான், ஷிரேயாஸ் அய்யர், டோனி, தினேஷ் கார்த்திக், மனிஷ் பாண்டே, ஹர்த்திக் பாண்ட்யா, யசுவேந்திர சகால், வாஷிங்டன் சுந்தர், புவனேஷ்வர்குமார், பும்ரா, ரகானே, குல்தீப்யாதவ், அக்‌ஷர் பட்டேல், சித்தார்த் கவூல்.

இலங்கை: திசாரா பெரைரா (கேப்டன்), உபுல்தரங்கா, குணதிலகா, திரிமானே, மேத்யூஸ், டிக்வெலா, அகிலா தனஞ்செயா, நுவன் பிரதீப், லக்மல் குணரத்னே, பதினரா, சமர விக்ரமா, குஷால் பெரைரா, சதுரங்க டிசில்வா, தனஞ்செய டிசில்வா, சமீரா.