இந்தியா - இலங்கை மோதும் 2-வது டெஸ்ட் போட்டி நாளை தொடக்கம்

நவம்பர் 23

இந்தியா - இலங்கை அணிகள் மோதும் 2-வது டெஸ்ட் போட்டி மகாராஷ்டிரா மாநிலம் நாக்பூரில் நாளை தொடங்குகிறது.

இலங்கை கிரிக்கெட் அணி இந்தியாவில் சுற்றுப்பயணம் செய்து 3 டெஸ்ட், 3 ஒருநாள் போட்டி, மூன்று 20 ஓவர் போட்டியில் விளையாடுகிறது.இரு அணிகளும் மோதிய முதல் டெஸ்ட் போட்டி சமனில் முடிந்தது. கொல்கத்தாவில் நடந்த முதல் டெஸ்டில் முதல் 2 நாட்கள் மழையால் பெரிதும் பாதிக்கப்பட்டது. இப்போட்டியில் முதல் இன்னிங்சில் சொதப்பிய இந்திய அணி 2-வது இன்னிங்சில் பேட்டிங், பந்து வீச்சில் அசத்தியது.வேகப்பந்து வீச்சுக்கு சாதகமான ஆடுகளத்தில் புவனேஸ்வர் குமார், முகமது சமி, உமேஷ் யாதவ் ஆகியோர் சிறப்பாக செயல்பட்டனர். 

இந்த நிலையில், 2-வது டெஸ்ட் போட்டி மகாராஷ்டிர மாநிலம் நாக்பூரில் நாளை தொடங்குகிறது. முதல் டெஸ்டில் 8 விக்கெட் வீழ்த்திய புவனேஷ்வர்குமார் திருமணம் காரணமாக எஞ்சியுள்ள 2 டெஸ்ட் போட்டிகளில் இருந்து விலகி உள்ளார். அவருக்கு பதில் வேகப்பந்து வீச்சாளர் இஷாந்த் சர்மா இடம் பெறுவார். இதேபோல, சொந்த காரணத்துக்காக நாக்பூர் டெஸ்டில் இருந்து மட்டும் தொடக்க வீரர் ஷிகார் தவான் விளையாடவில்லை. இதனால் முரளி விஜய் தொடக்க வீரராக களம் இறங்குகிறார்.

முதல் டெஸ்ட் போட்டியில் வேகப்பந்துக்கு சாதகமாக அமைக்கப்பட்ட ஆடுகளத்தில் சுழற்பந்து வீச்சாளர்கள் அஸ்வின், ஜடேஜா ஆகியோர் ஒரு விக்கெட் கூட வீழ்த்தவில்லை. மேலும், அவர்களுக்கு குறைந்த அளவிலேயே பந்துவீச வாய்ப்பு அளிக்கப்பட்டது. முதல் டெஸ்டை போலவே நாளை தொடங்கும் 2-வது டெஸ்டிலும் வேகப்பந்து ஆடுகளத்தை அமைக்க வலியுறுத்தப்பட்டு இருக்கிறது. இதனால், அஸ்வின், ஜடேஜா ஆகியோரில் ஒருவர் கழற்றி விடப்பட்டால் தமிழகத்தை சேர்ந்த ஆல்-ரவுண்டர் விஜய் சங்கர் இடம் பெறலாம். நாக்பூர் டெஸ்டில் வெற்றி பெற்று தொடரில் முன்னிலை பெறும் ஆர்வத்தில் இந்தியா உள்ளது.

சன்டிமால் தலைமையிலான இலங்கை அணியில் சமர விக்ரமா, கருண ரத்னே, திரிமானே, மேத்யூஸ், டிக்வெலா போன்ற பேட்ஸ்மேன்கள் உள்ளனர். பந்துவீச்சில் லக்மல், ‌ஷனகா, கெம்யேஜ், ஹெராத், பெரைரா ஆகியோர் இருக்கின்றனர். இந்த அணியும் இந்திய அணியை வீழ்த்தி தொடரில் முன்னிலை பெறும் முனைப்பில் இருப்பதால் ஆட்டம் விறுவிறுப்பாக இருக்கும் என எதிர்பார்க்கப்படுகிறது.

இரு அணி வீரர்கள் விவரம் வருமாறு:-

இந்தியா: விராட் கோலி (கேப்டன்), முரளி விஜய், லோகேஷ், ராகுல், புஜாரா, ரகானே, ரோகித் சர்மா, விருத்திமான் சகா, அஸ்வின், ஜடேஜா, குல்தீப் யாதவ், முகமது சமி, உமேஷ் யாதவ், இஷாந்த் சர்மா, விஜய் சங்கர்.

இலங்கை: சன்டிமால் (கேப்டன்), சமரவிக்ரமா, திரிமானே, கருணரத்னே, மேத்யூஸ், டிக்வெலா, ‌ஷனகா, தில்ருவான் பெரைரா, ஹெராத், லக்மல், கேம்யேஜ், தனஜெயாடி சில்வா, விஸ்வா பெர்ணாடோ, சாண்டகன், ரோ‌ஷன் சில்வா.