துபாயில் நடந்த சர்வதேச யோகா போட்டி - தங்கம் வென்ற கோவை மாணவர்களுக்கு குவியும் பாராட்டு!

கோவை: துபாயில் நடைபெற்ற சர்வதேச அளவிலான யோகா போட்டியில் தங்கப் பதக்கம் வென்ற கோவையை சேர்ந்த மாணவ மாணவிகளுக்கு உற்சாக வரவேற்பு அளிக்கப்பட்டது.

சர்வதேச அளவிலான யோகா சாம்பியன்ஷிப் போட்டி துபாயில் நடைபெற்றது. இந்த போட்டியில் தேசிய அளவிலான யோகா போட்டிகளில் தேர்வு செய்யப்பட்ட வீரர் மற்றும் வீராங்கனைகள் கலந்து கொண்டனர்.

கடந்த 8ஆம் தேதி முதல் 12ஆம் தேதி வரை நடைபெற்ற இந்த போட்டியில் இந்தியா, துபாய், அபுதாபி ஷார்ஜா, அமெரிக்கா, மெக்சிகோ, கனடா, மஸ்கட், சவுதி அரேபியா உள்ளிட்ட நாடுகளை சேர்ந்த பலர் பங்கேற்றனர்.

சப் ஜூனியர், ஜூனியர், சீனியர், சூப்பர் சீனியர் உள்ளிட்ட பிரிவுகளில் மயூர் ஆசனம், திருவிக்கிரம் ஆசனம், சிரசாசனம், பூரண ஸலபாசனம் என பல்வேறு ஆசனங்கள் கொண்டு இந்த யோகா போட்டிகள் நடத்தப்பட்டன.

இதில் கோவையை சேர்ந்த பள்ளி மாணவர்களான கனித்ரா, தேவகர்ஷன், திவித் மற்றும் கல்லூரி மாணவர் கௌதம் உள்ளிட்ட நான்கு பேரும் தங்க பதக்கங்களை வென்று முதல் பரிசை பெற்று சாதனை படைத்தனர்.



யோகா போட்டியில் வென்று கோவை திரும்பிய மாணவ மாணவிகளுக்கு ரயில் நிலையத்தில் பெற்றோர்கள் உற்சாக வரவேற்பு அளித்தனர்.

சர்வதேச அளவில் யோகா போட்டியில் சாதனை படைத்து இந்தியாவிற்கு பெருமை சேர்த்த மாணவ மாணவிகளுக்கு பலரும் பாராட்டுகளை தெரிவித்து வருகின்றனர்.