சின்ன வெங்காயத்தின் விலை உயர்வு குறுகிய காலம் மட்டுமே இருக்கும்

கோவை : சின்ன வெங்காயத்தின் விலை உயர்வு குறுகிய காலம் மட்டுமே இருக்கும் என தமிழ்நாடு வேளாண்மைப் பல்கலைக்கழகம் அறிவித்துள்ளது.

உலகில் வெங்காயம் உற்பத்தி செய்யும் நாடுகளில் இந்தியா இரண்டாவது இடத்தில் உள்ளது. இந்திய வெங்காயத்தின் காரத்தன்மையால் மிகவும் பிரபலமாகவே உள்ளது. கர்நாடகா மற்றும் ஆந்திராவின் தெற்கு பகுதிகளிலும் மற்றும் தமிழ்நாட்டிலும் சின்ன வெங்காயம் அதிகளவு பயிரிடப்படுகின்றன. தமிழ்நாட்டில், வேளாண் மற்றும் விவசாய நல அமைச்சகத்தின் மதிப்பீட்டின் படி, 2017 -18 ஆண்டில் சின்ன வெங்காயம் 0.28 இலட்சம் எக்டர் பரப்பளவில் பயிரிடப்பட்டு 3.0 லட்சம் டன்கள் உற்பத்தி செய்யப்பட்டுள்ளது. திண்டுக்கல், திருப்பூர், பெரம்பலூர், திருச்சி, நாமக்கல், தேனி மற்றும் மதுரை ஆகிய மாவட்டங்களில் சின்ன வெங்காயத்தை அதிகளவு பயிரிடுகின்றனர்.

இலங்கை, இந்தோனேசியா, தாய்லாந்து, சிங்கப்பூர் மற்றும் மலேசியா ஆகிய நாடுகளுக்கு தமிழ்நாட்டிலுள்ள சின்ன வெங்காயம் அதிகளவு ஏற்றுமதி செய்யப்படுகிறது. வெளிநாட்டு சந்தை நுகர்வோர்கள், 23 மி.மி அளவுடைய சின்ன வெங்காயத்தையே அதிகளவு விரும்புகின்றனர். திருச்சி மற்றும் திண்டுக்கல் சந்தைகளுக்கு தாராபுரம், பல்லடம் மற்றும் உடுமலைப்பேட்டை ஆகிய பகுதிகளிலிருந்து சின்ன வெங்காயம் வரத்து வருகிறது. தற்போது, உற்பத்தியாளர்கள் விலை உயரும் என்ற நம்பிக்கையில் சேமித்தும் வைத்துள்ளனர். வர்த்தக மூலகங்களின்படி, இருப்பு நிலை மற்றும் மைசூர் வரத்து துவங்கும் வரை வெங்காயத்தின் விலை உயர்வாகவே இருக்கும்.

இச்சூழலில், விவசாயிகள் விதைப்பு முடிவுகளை எடுக்க ஏதுவாக, தமிழ்நாடு வேளாண்மைப் பல்கலைக்கழகத்தில், தமிழ்நாடு பாசன விவசாய மேம்பாட்டு திட்டத்தின் கீழ் இயங்கி வரும், வேளாண் மற்றும் ஊரக மேம்பாட்டு ஆய்வு மையத்தின் விலை முன்னறிவிப்புத் திட்டம், கடந்த 12 ஆண்டுகளாக திண்டுக்கல் சந்தையில் நிலவிய சின்ன வெங்காயம் விலையை மற்றும் சந்தை ஆய்வுகளை மேற்கொண்டது. ஆய்வுகளின் அடிப்படையில், வரும் செப்டம்பர் மாத இறுதி வரை தரமான சின்ன வெங்காயம் சராசரி பண்ணை விலை கிலோவிற்கு ரூ. 32 முதல் 34 வரை இருக்கும் என கணிக்கப்பட்டுள்ளது.

மேலும், அண்டை மாநிலங்களிலிருந்து வரும் வரத்து மற்றும் பருவ மழையைப் பொறுத்து சின்ன வெங்காயத்தின் விலையில் மாற்றங்கள் இருக்கும். எனவே, விவசாயிகள் மேற்கூறிய சந்தை ஆலோசனை அடிப்படையில், விதைப்பு முடிவுகளை எடுக்குமாறு பரிந்துரைக்கப்படுகின்றனர்.