சின்ன வெங்காயத்தின் விலையில் குறிப்பிடத்தக்க மாற்றம் இருக்காது

கோவை : கர்நாடகாவில் குறைந்த மழை இருந்ததாலும், வெங்காய உற்பத்தி இயல்பாகவே உள்ளதால், பண்ணை விலையில் குறிப்பிடத்தக்க மாற்றம் இருக்காது என தமிழ்நாடு வேளாண்மைப் பல்கலைக்கழகத்தின் உள்நாட்டு மற்றும் ஏற்றுமதி சந்தைத் தகவல் மையம் தெரிவித்துள்ளது. 

இது தொடர்பாக வெளியிடப்பட்டுள்ள அறிவிப்பில் :- தென்னிந்தியாவில் குறிப்பாக தமிழ்நாடு, கர்நாடகா மற்றும் ஆந்திரபிரதேசம் ஆகிய மாநிலங்கள் பயிரிடும் காய்கறி பயிர்களில் சின்ன வெங்காயம் முக்கிய பயிர்களாகும். 

தமிழகத்தில் திண்டுக்கல், திருப்பூர், பெரம்பலூர், திருச்சி, நாமக்கல், தேனி மற்றும் மதுரை ஆகிய மாவட்டங்களில் சின்ன வெங்காயம் அதிகளவு பயிரிடப்படுகின்றது. தமிழகம் மட்டும் நாட்டின் மொத்த உற்பத்தியில் 85 சதவீதம் பங்களிக்கின்றது. 

சின்னவெங்காயம் பெரும்பாலும் நாற்றங்கால் மற்றும் விதைப்பு வெங்காயம் மூலம் சாகுபடி செய்யப்படுகிறது. குறிப்பாக, விதைப்பு வெங்காயம், விதை உற்பத்தி செய்யவே அதிகளவு பயன்படுத்தப்படுகிறது. தை மற்றும் மாசி பட்டத்தில் நாற்றங்கால் முறையில் பெரும்பாலும் சாகுபடி செய்யப்படுகின்றது. 

இப்பட்டத்தில் சாகுபடி செய்யப்படும் சின்ன வெங்காயம், ஏற்றுமதிக்கு அதிகளவு விரும்பப்படுகிறது. இலங்கை, இந்தோனேசியா, தாய்லாந்து, சிங்கப்பூர் மற்றும் மலேசியா ஆகிய நாடுகளுக்கு தமிழ்நாடு சின்ன வெங்காயம் அதிகளவு ஏற்றுமதி செய்யப்படுகிறது. 

தற்போது நாமக்கல், கோபிச் செட்டிபாளையம் மற்றும் சத்தியமங்கலம் ஆகிய இடங்களிருந்து வரத்து கோவை சந்தைகளுக்கு வருகிறது. மேலும், மைசூரிலிருந்து வரும் வரத்தானது மார்ச் 19-ம் தேதி வரை இருக்கும். வர்த்தக ஆதாரங்களின்படி, ரபீ பருவத்தில் கர்நாடகாவில் குறைந்த மழை இருந்ததாலும், வெங்காய உற்பத்தி இயல்பாகவே உள்ளதால் பண்ணை விலையில் குறிப்பிடத்தக்க மாற்றம் இருக்காது எனக் கருதப்படுகிறது. 

இச்சூழலில், விவசாயிகள் விதைப்பு முடிவுகளை எடுக்க ஏதுவாக, தமிழ்நாடு வேளாண்மைப் பல்கலைக்கழகத்தின், வேளாண் மற்றும் ஊரக மேம்பாட்டு ஆய்வு மையத்தில் இயங்கி வரும் விலை முன்னறிவிப்புத் திட்டம், கடந்த 15 ஆண்டுகளாக திண்டுக்கல் சந்தையில் நிலவிய சின்ன வெங்காயம் விலையை மற்றும் சந்தை ஆய்வுகளை மேற்கொண்டது. 

ஆய்வுகளின் அடிப்படையில், அறுவடையின் போது, தரமான சின்ன வெங்காயம் சராசரி பண்ணை விலை கிலோவிற்கு ரூ. 25 முதல் ரூ. 27 வரை இருக்கும் என கணிக்கப்பட்டுள்ளது. எனவே, விவசாயிகள் மேற்கூறிய சந்தை ஆலோசனை அடிப்படையில், விதைப்பு முடிவுகளை எடுக்குமாறு பரிந்துரைக்கின்றனர், இவ்வாறு தெரிவிக்கப்பட்டுள்ளது.