நேரடி நெல் விதைக்கும் கருவி, சிறுதானிய உமி நீக்கும் இயந்திரங்கள்!

நேரடி நெல் விதைக்கும் கருவி, சிறுதானிய உமி நீக்கும் இயந்திரம் குறித்து கூறும், கோவை, மத்திய வேளாண் பொறியியல் நிறுவனத்தின், மண்டல மைய, முதன்மை விஞ்ஞானி, முனைவர், த.செந்தில்குமார் கூறுகிறார்:

*மத்திய வேளாண் பொறியியல் நிறுவனத்தின் மண்டல மையம், கோவையில், 1983ல் துவங்கப்பட்டது.ஆரம்பத்தில், நெல் சாகுபடியில் பயன்படும் சிறிய கருவிகளின் உற்பத்தி மேம்பாட்டுக்கு, வழிகாட்டும் தொழில் விரிவாக்க மையமாகத் துவங்கப்பட்டது.

*தென் மாநிலங்களில் உள்ள சிறு மற்றும் குறுந்தொழில் உற்பத்தியாளர்கள், தொழில் முனைவோர், பண்ணை இயந்திரங்கள் மற்றும் அறுவடைக்குப் பின் பயன்படுத்தப்படும் கருவிகளை உற்பத்தி செய்வதன் வழிகாட்டுதலை, இம்மையத்தில் பெற்று வருகின்றனர்.

*இந்த மண்டல மையத்தில், 30க்கும் மேற்பட்ட இயந்திரங்கள், விவசாயிகள் பயன்பாட்டுக்காக வடிவமைக்கப்பட்டுள்ளன.

நெல் நாற்று நடுவதை தவிர்த்து, நேரடி யாக நெல் சாகுபடி செய்ய, நன்செய் நிலங்களில் இந்த நேரடி நெல் விதைக்கும் கருவியைப்பயன்படுத்தலாம்.

*உருளைகளில் முளை கட்டிய நெல் விதைகளை நிரப்பி, அதை ஒரு நபர், வயலில் இழுத்துச் செல்வதன் மூலம், விதைகள் வரிசையாக விதைக்கப்படுகின்றன.

*இதனால், நாற்று விட்டு, நடவு செய்யும் செலவும் குறைகிறது; விளைச்சலும் குறைவில்லாமல் கிடைக்கிறது.

தகுந்த இடைவெளியில் விதைப்பதால், களை எடுப்பதிலும் சிரமம் ஏற்படுவதில்லை.

*இந்தக் கருவியின் தொழில்நுட்பத்தை, எங்களிடம் இருந்து பெற்று, தனியார் நிறுவனங்கள் தயாரித்து விற்பனை செய்து வருகின்றன. இதன் விலை, 4,800 ரூபாய்.

*மேம்படுத்தப்பட்ட சிறுதானிய உமி நீக்கும் கருவி வாயிலாக, மணிக்கு, 100 கிலோ உமி நீக்குவதோடு, அரிசியையும், உமியையும் தனித்தனியே பிரித்துக் கொடுக்கிறது.

*இந்த கருவி, 4 அடி உயரம் இருப்பதால், பெண்கள் கூட சிரமமின்றி இயக்கலாம். ஒரு முனை மின் மோட்டார் மூலம் இயங்குவதால், வீட்டு மின் இணைப்பில் கூடப் பயன்படுத்தலாம்.இந்தக் கருவியின் விலை, 48 ஆயிரம் ரூபாய்.

எங்களின் மையத்தில் கண்டுபிடித்துள்ள, 35 வகையான கருவிகளைப் பார்வையிடவும், பயன்படுத்திக் கொள்ளவும் விவசாயிகளை அழைக்கிறோம்.

மத்திய வேளாண் பொறியியல் நிறுவனம், மண்டல மையம், கரும்பு உற்பத்தி நிறுவனம் அஞ்சல், கோவை – 641 007 என்ற முகவரியிலும், 9842955606 என்ற மொபைல் எண் மற்றும் 04222472624 , 04222472623 என்ற தொலைபேசி எண்களிலும் தொடர்பு கொள்ளலாம்.