அன்னிய செலாவணி கொடுக்கும் பயிர் ஆமணக்கு!

சேலம் மாவட்டம், ஏத்தாப்பூர், மரவள்ளி மற்றும் ஆமணக்கு ஆராய்ச்சி நிலைய தலைவர் வெங்கடாசலம கூறுகிறார:

ஆமணக்கு பயிர், நம் நாட்டுக்கு அன்னிய செலாவணியை கொடுக்கும் பயிர். ஆமணக்கு எண்ணெய், வெளிநாடுகளுக்கு ஏற்றுமதி செய்யப்படுகிறது.

ஆமணக்கின் தேவை, ஆண்டுக்காண்டு அதிகரித்து வருவதால், சர்வதேச மற்றும் இந்திய சந்தையில் இதன் விலை உயர்ந்து வருகிறது.

மரவள்ளி மற்றும் ஆமணக்கு ஆராய்ச்சி நிலையத்தில் இதுவரை, டி.எம்.வி.சி.எச் – 1 மற்றும் ஒய்.ஆர்.சி.எச் – 1 என்ற, இரண்டு வீரிய ஒட்டு ரக ஆமணக்கு ரகங்கள், 1998 மற்றும் 2009ல், விவசாயிகளின் பயன்பாட்டிற்காக வெளியிடப்பட்டுள்ளன.

ஆமணக்கில் உயர் விளைச்சல், வீரிய ஒட்டு ரகங்கள் மற்றும் புதிய தொழில்நுட்பங்களை விவசாயிகளிடையே அறிமுகப்படுத்தியதை அங்கீகரிக்கும் பொருட்டு, 2012ல், ஐதராபாதில் உள்ள இந்திய எண்ணெய் வித்து ஆராய்ச்சி கழகம், ஏத்தாப்பூர் ஆராய்ச்சி நிலையத்தை தேர்வு செய்து, விருது வழங்கியது.

தமிழகத்தில் சித்திரை, ஆடி மற்றும் ஐப்பசி பட்டங்களில், ஆமணக்கு பயிரிடப்பட்டு வருகிறது.

குறைந்த செலவினம், குறைந்த நீர் தேவை, கூலியாள்கள், வறட்சியை தாங்கி வளரும் பண்பு மற்றும் நிலையான சந்தை மதிப்பு காரணங்களால், பெரும்பான்மையான சிறு, குறு விவசாயிகள், ஆமணக்கை விருப்ப பயிராக சாகுபடி செய்கின்றனர்.

வீரிய ஓட்டு ரக ஆமணக்கு, அனைத்து விதமான மண் வகைகளிலும் குறிப்பாக, வளம் குன்றிய மண்ணிலும் வளர்ந்து, விளைச்சலை கொடுக்கும்.

இந்த பயிரை, இறவை மற்றும் மானாவாரி பட்டங்களில், நிலக்கடலை, உளுந்து, வெள்ளரி, சின்ன வெங்காயம் மற்றும் மஞ்சள் ஆகிய பயிர்களுடன் ஊடுபயிராகவும் பயிரிட்டு, கூடுதல் வருமானம் பெறலாம்.

இதுமட்டுமின்றி, முக்கிய பயிர்களில் பூச்சித் தாக்குதலை குறைக்கவும் வழி செய்கிறது.

ஆமணக்கு செடியிலுள்ள கிளையின் தன்மை, தண்டின் நிறம், சாம்பல் பூச்சு, காய்களின் தன்மை மற்றும் வயது ஆகியவை, ரகங்களுக்கு ஏற்ப மாறுபடும். அதிக விளைச்சல் தரக்கூடிய, ஒய்.ஆர்.சி.எச் – 1, டி.சி.எச் – 519, ஜி.சி.எச் – 4 ஆகிய ரகங்களை, தனிப்பயிராக சாகுபடி செய்யும் போது, ஏக்கருக்கு, 1,500 கிலோ வரை, மானாவாரியிலும் விளைச்சல் பெறலாம்.

வீரிய ஒட்டு ரக ஆமணக்கு ரகங்கள், 150 – 170 நாள்களுக்குள் அறுவடை முடிந்து விடும். முதல் அறுவடை, விதைத்த, 90வது நாளும், இரண்டாவது அறுவடை, 120வது நாளும், கடைசி அறுவடை, 150வது நாளும் செய்யலாம். வீரிய ஒட்டு ரக ஆமணக்கு கிலோ, 300 ரூபாய்க்கு விற்கப்படுகிறது.

இதன் விதைகளை, மரவள்ளி மற்றும் ஆமணக்கு ஆராய்ச்சி நிலையத்தை தொடர்பு கொண்டு பெற்றுக் கொள்ளலாம்.