கோவையில் பதுக்கி வைத்த 1050-கிலோ ரேஷன் அரிசி பறிமுதல்

கோவை: கோவையில் கணுவாய்‌ மற்றும்‌ இதனை சுற்றியுள்ள வடமாநிலத்தவருக்கு விற்பனை செய்ய பதுக்கி வைத்திருந்த 1050-கிலோ ரேஷன் அரிசியை போலீசார் கைப்பற்றினர்.

கோயம்புத்தூர்‌ குடிமைப்பொருள்‌ வழங்கல்‌ குற்றப்‌ புலனாய்வுத்துறை எல்லைக்குட்பட்ட பகுதிகளில்‌ கிடைத்த ரகசியத் தகவலின்படி தடாகம்‌ ரோடு கணுவாய்‌ அருகில்‌ காவல்‌ ஆய்வாளர்‌ மேனகா தலைமையில்‌, போலீசார்‌ ரோந்து நடவடிக்கையில்‌ ஈடுபட்டிருந்தனர்.

அப்போது 26.02.2022-ம்‌ தேதி மாலை சுமார்‌ 06.00-மணியளவில்‌ மதன்குமார்‌ என்பவர்‌ பொது விநியோகத்திட்ட ரேசன்‌ அரிசியைக் கணுவாய்‌ மற்றும்‌ இதனை சுற்றியுள்ள மக்களிடமிருந்து குறைந்த விலைக்குப் பெற்று வடமாநிலத்திலிருந்து வந்து வேலை பார்க்கும்‌ நபர்களுக்கு அதிக விலைக்கு விற்பதற்காகப் பதுக்கி வைத்திருந்த சுமார்‌ 1050-கிலோ பொது விநியோகத்திட்ட ரேசன்‌ அரிசியை புட்செல்‌ போலீசார்‌ கைப்பற்றிப் பதுக்கலில்‌ ஈடுபட்ட நபரான மதன்குமார்‌ என்பவரைத் தேடி வருகிறார்கள்‌.