இன்று பிடிப்படுமா T23 புலி..? மசினகுடி வனப்பகுதியில் புலியை பிடிக்கும் பணி இன்று 13வது நாளாக துவங்கியது..!

நீலகிரி: நீலகிரி மாவட்டம், மசினகுடி சிங்காரா வனப்பகுதியில் T23 புலியை பிடிக்கும் பணி இன்று 13வது நாளாக துவங்கியது. இன்று காலை, தொடங்கப்பட்ட T23 புலியை பிடிக்கும் ஆப்ரேஷனானது வனப்பகுதிக்குள் நான்கு இடங்களில் அமைக்கப்பட்ட மரன்களின் மீது கால்நடை மருத்துவர்கள் அமர்ந்து புலியை கண்காணிக்கும் பணியில் ஈடுபட்டுவருகின்றனர்.



நேற்றைய தினம் முழுவதும், புலி வனத்துறையினரின் கண்களுக்கு தென்படாத நிலையில், சிங்காரா பகுதியில் இருந்து வேறு பகுதிக்கு அந்த ஆண் புலி சென்றுவிட்டதா? என்ற கோணத்தில் ஆய்வு மேற்கொள்ளப்படவுள்ளது. அதன்படி, வனப்பகுதிக்குள் பொருத்தப்பட்டுள்ள 85 கண்காணிப்பு கேமராக்களையும், இன்று வனத்துறையினர் ஆய்வு செய்து வருகின்றனர். மேலும், தொடர்ந்து இன்றும் வனப்பகுதிக்குள் அமைக்கப்பட்டுள்ள 4 மரண்கள் மீது அமர்ந்து மயக்க ஊசி செலுத்த மருத்துவ குழு தயாராக நிலையில் உள்ளது.



13 நாட்களாக T 23 புலியை பிடிக்க வனத்துறையினர் தீவிரம் காட்டி வரும் நிலையில், தமிழக தலைமை வன உயிரின பாதுகாவலர் சேகர் குமார் நீரஜ் அறிவியல் ரீதியாக புலியை பிடிப்பதற்கான பணிகள் நடந்து வருவதாக தெரிவித்துள்ளார். இன்று அதிகாலை முதல், அடுத்தடுத்து நான்கு இடங்களில் அமைக்கப்பட்டுள்ள பரணில், அந்தந்த குழுக்கள் தீவிர கண்காணிப்பில் ஈடுபடும், என அவர் தெரிவித்துள்ளார்.