கோவை அரசு கலைக் கல்லூரியில் இளங்கலை பாடப்பிரிவில் 1219 இடங்கள், முதுகலை பாடப்பிரிவில் 383 இடங்கள் நிரப்பப்பட்டன..!

கோவை: கோவை அரசு கலைக் கல்லூரியில் இளங்கலை பாடப்பிரிவில் 1219 இடங்களும் முதுகலை பாடப்பிரிவில் 383 இடங்கள் நிரப்பப்பட்டுள்ளன.

கோவை அரசு கலைக்கல்லூரியில் பி.ஏ. தமிழ், ஆங்கிலம், அரசியல் மற்றும் பி.எஸ்சி. விலங்கியல், இயற்பியல், வேதியியல், தாவரவியல், பி.காம் உள்பட 23 வகையான பாடப்பிரிவுகள் உள்ளன. இதில் மொத்தம் 1,433 இடங்களுக்கான முதலாமாண்டு மாணவர் சேர்க்கை கடந்த மாதம் 26-ந் தேதி துவங்கியது.

முதல் நாளில் முன்னாள் படைவீரர்கள் வாரிசுகள், விளையாட்டு வீரர்கள், மாற்றுத்திறனாளிகள் உள்ளிட்டோருக்கு இடங்கள் ஒதுக்கப்பட்டன.

இதனைத் தொடர்ந்து பொதுப்பிரிவினருக்கு கவுன்சிலிங் நடைபெற்றது. இதில் மொத்தம் 1,114 இடங்கள் நிரப்பப்பட்டன. இன்னும் 319 இடங்கள் காலியாக இருந்தன. இந்த காலி இடங்களுக்கான 2-ம் கட்ட கவுன்சிலிங் நேற்று கல்லூரியில் நடைபெற்றது. இதில் 105 இடங்கள் நிரப்பப்பட்டன. இதன் மூலம் மொத்தம் 1219 இடங்கள் நிரப்பப்பட்டன.

இதேபோல், முதுகலை பாடப்பிரிவில் உள்ள 552 இடங்களுக்கான முதலாம் ஆண்டு மாணவர் சேர்க்கைக்கான முதல் கட்ட கவுன்சிலிங் நிறைவடைந்த நிலையில் 179 இடங்கள் காலியாக இருந்தன. இந்த காலி இடங்களுக்கான 2ம் கட்ட கவுன்சிலிங் நேற்று நடந்தது. அதில் 10 இடங்கள் நிரப்பப்பட்டன. இதன் மூலம் முதுகலை பாடப்பிரிவில் மொத்தம் 383 இடங்கள் நிரப்பப்பட்டுள்ளன.