இந்த ஸ்பீக்கரை மின்சாரம் மற்றும் சோலார் என இரண்டு வகையிலும் சார்ஜ் செய்து கொள்ளலாம். ரூபாய். 2,000 விற்க திட்டம்.
கோவை: மலிவு விலை தானியங்கி சானிடைசர் மெஷின், 3 இன் 1 சைக்கிள், கெமிக்கல் அளவு கண்டறியும் PH மீட்டர், சிக்னல் பூஸ்டர் உள்ளிட்ட கருவிகளை கண்டுபிடித்த கோவையை சேர்ந்த கல்லூரி மாணவர் பரத் குமார், புதிதாக சோலார் ப்ளூடூத் ஸ்பீக்கர் என்ற கருவியை தயாரித்துள்ளார்.
நம்மிடம் பேசிய சாதனை மாணவர் பரத் குமார் கூறியதாவது, "நான் கோவை பி எஸ் ஜி கலை அறிவியல் கல்லூரியில் இளங்கலை பட்டப்படிப்பு படித்து வருகிறேன். சமுதாயத்திற்கு பயன்படும் வகையில் புதுமையான படைப்புகளை கண்டுபிடித்து அவற்றை குறைந்த விலையில் மக்களுக்கு விற்பனை செய்ய வேண்டும் என்ற நோக்கில் மத்திய அரசின் எம்எஸ்எம்இ மாணவர் பிரிவில் பதிவு செய்து பல்வேறு பொருட்களை தயாரித்து வருகிறேன்.
இதுவரை, மலிவு விலை தானியங்கி சானிடைசர் மெஷின், 3 இன் 1 சைக்கிள், கெமிக்கல் அளவு கண்டறியும் PH மீட்டர், சிக்னல் பூஸ்டர் உள்ளிட்ட கருவிகளை தயாரித்து உள்ளேன். தற்போது சோலார் ப்ளூடூத் ஸ்பீக்கர் தயாரித்துள்ளேன். மார்க்கெட்டில் தற்போது இந்த வகையிலான ப்ளூடூத் ஸ்பீக்கர் வாங்க குறைந்தது 4 ஆயிரத்து 500 ரூபாய் ஆகும்.
ஆனால், நான் தயாரித்துள்ள சோலார் ப்ளூடூத் ஸ்பீக்கர் வெறும் 2,000 ரூபாய்க்கு விற்பனை செய்யத் திட்டமிட்டுள்ளேன். குறைந்த விலையில் தரமான பொருட்களை கொண்டு இந்த ஸ்பீக்கரை வடிவமைத்துள்ளேன். மேலும், மின்சாரம் மற்றும் சோலார் என இரண்டு வகையிலும் இந்த ஸ்பீக்கரை சார்ஜ் செய்து கொள்ளலாம்.
சூரிய ஒளி மூலம் சார்ஜ் செய்தால் நான்கரை மணி நேரம் இந்த கருவியை பயன்படுத்தலாம். அதே, மின்சாரம் மூலம் சார்ஜ் செய்தால் கருவியை 5 மணி நேரம் பயன்படுத்தலாம்.
இதுவரை, என்னுடைய 4 தயாரிப்புகளுக்கும் நல்ல வரவேற்பு கிடைத்தது. தற்போது, புதிதாக தயாரித்துள்ள இந்த சோலார் ப்ளூடூத் ஸ்பீக்கர் கருவிக்கும் நல்ல வரவேற்பு கிடைக்கும் என நம்புகிறேன். என்னுடைய முயற்சிகளுக்கு எனது பெற்றோர், கல்லூரி நிர்வாகம், ஆசிரியர்கள் மற்றும் நண்பர்கள் அளித்துவரும் ஆதரவு எனக்கு மிகுந்த ஊக்கம் அளிப்பதாக அமைந்துள்ளது. எதிர்வரும் நாட்களில் சமுதாயத்திற்கு பயன்படும் வகையில், மேலும் பல்வேறு பொருட்களை தயாரிக்கும் முயற்சிகளைதொடர்ந்து மேற்கொள்வேன்.
இவ்வாறு பரத் குமார் கூறினார்.
இது தொடர்பாக பரத்குமாரை தொடர்பு கொள்ள +919025259248 என்ற எண்ணிற்கு அழைக்கவும்.