கோவை மாவட்டத்தில் ஒன்றரை வருடங்களுக்குப் பிறகு பள்ளி, கல்லூரிகள் திறப்பு - மாணவர்கள் உற்சாகம்..!

கோவை: கோவை மாவட்டத்தில் ஒன்றரை வருடங்களுக்கு பிறகு பள்ளி, கல்லூரிகள் திறக்கப்பட்டுள்ளதால் மாணவர்கள் உற்சாகத்துடன் பள்ளி திரும்பினர்.



தமிழகத்தில் இன்று 9, 10, 11 மற்றும் 12ம் வகுப்பு மற்றும் கல்லூரி மாணவர்களுக்கு மட்டும் வகுப்புகள் நடைபெறவுள்ளது. பள்ளிகள் திறப்பதை முன்னிட்டு கோவை பள்ளிகளில் மாணவர்கள் அனைவரின் உடல் வெப்ப நிலையை ஆய்வு செய்தும், தனி நபர் இடைவேளை விட்டும், நுழைவு வாயில்களில் சானிடய்ஸ்ர் பயன்படுத்தியும் மாஸ்க் அணிந்திருப்பதை உறுதி செய்த பின்னரே மாணவர்களை வகுப்புக்கு அனுப்பப்படுகின்றனர்.



இந்த நிலையில், இன்று காலை 8 மணி முதலே மாணவர்கள் ஆர்வத்துடன் பள்ளிகளுக்கு வந்தனர். தமிழக அரசின் கட்டுப்பாடுகளைப் பின்பற்றி வகுப்புகளை நடத்தவிருப்பதாக ஆசிரியர்கள் தெளிவுபடுத்தினர்.

கோவையில் மொத்தம் 259 பள்ளிகள், 100 கல்லூரிகள் திறக்கப்பட்டுள்ளது. இதில் வகுப்புகளுக்கு 20 மாணவர்கள் மட்டுமே அனுமதிக்கப்படுகின்றனர்.

பள்ளிகளில் போதிய இடவசதி இல்லாதபட்சத்தில் 9 மற்றும் 11-ம் வகுப்பு மாணவர்களுக்கு சுழற்சி முறையிலும், 10 மற்றும் 12ம் வகுப்பு மாணவர்களுக்கு தினமும் வகுப்புகள் நடத்தலாம் என்றும் பள்ளி கல்வித்துறை தெரிவித்துள்ளது.