வால்பாறையில் சூறாவளி காற்றுடன் கனமழை... ஆறுகளில் வெள்ளப்பெருக்கு..!

வால்பாறை: வால்பாறையில் டாக்ட்டே புயலின் தொடர்ச்சியாக வால்பாறை நகரம் மற்றும் சுற்றுவட்டாரப் பகுதிகளில் கடும் காற்றுடன் கூடிய கனமழை பெய்து வருகிறது.



கோவை மாவட்டம் வால்பாறையில் டாக்ட்டே புயலின் தொடர்ச்சியாக வால்பாறை நகரம் மற்றும் அதன் சுற்றுவட்டாரப் பகுதிகளில் கடும் காற்றுடன் கூடிய கனமழை பெய்து வருகிறது. இதன் காரணமாக பல்வேறு இடங்களில் மரங்கள் விழுந்து சாலைப் போக்குவரத்து பாதிப்படைந்துள்ளது. இரவு மின் விநியோகம் பாதிப்படைந்துள்ளது. தொலைத்தொடர்பு சேவையும் பாதிப்படைந்துள்ளது.



வால்பாறை வட்டாட்சியர் ராஜா பொதுமக்களுக்கு விடுத்துள்ள அறிக்கையில், கனமழை தொடர்பான முக்கிய நிகழ்வுகள், பாதிப்புகள், முன்னெச்சரிக்கை நடவடிக்கைகள், அரசுத்துறைகள் தலையிட்டு நடவடிக்கை எடுக்கவேண்டிய நேர்வுகள் முதலான எந்தச் சிறிய தகவலாக இருப்பினும் காலதாமதம் ஏதுமின்றி எந்த நேரம் ஆயினும் தனது அலைபேசி எண்ணைத் தொடர்பு கொண்டு தெரிவிக்கும்படி கேட்டுக் கொண்டுள்ளார். வட்டாட்சியர் அலைபேசி எண்: 944 5000 577. இன்று காலை 6 மணி நிலவரப்படி வால்பாறையில் 70 மி.மீ., தாலுக்கா அலுவலகத்தில் 68 மி.மீ., கீழ் நீரார் அணை 65 மி.மீ., மேல் நீரார் அணை 69 மி.மீ., சோலையார் அணை 99 மி.மீ மழை பதிவாகி உள்ளது. வால்பாறை வட்டாட்சியர் ராஜா தலைமையில் வருவாய்த்துறையினர் தீவிர ரோந்து பணிகளை மேற்கொண்டுள்ளனர்.