கோவை மாவட்டவாக்குச்சாவடிகளில் அடிப்படை வசதிகள் ஏற்படுத்தும் பணி நிறைவு!

கோவை: கோவை மாவட்டத்தில் வாக்குச் சாவடிகளுக்குத் தேவையான அடிப்படை வசதிகள் ஏற்படுத்தும் பணிகள் நிறைவடைந்தன.

கோவை மாவட்டத்தில் 1,085 வாக்குப் பதிவு மையங்களில் 4,427 வாக்குச் சாவடிகள் அமைக்கப்பட்டுள்ளன. வரும் சட்டமன்ற தேர்தலுக்காக 1,370 வாக்குச் சாவடிகள் கூடுதலாக அமைக்கப்பட்டுள்ளன. இதில் ஏற்கனவே உள்ள மையங்களில் கூடுதல் வாக்குச் சாவடிகளும், புதிய மையங்களும் தேர்வு செய்யப்பட்டு வாக்குச் சாவடிகள் அமைக்கப்பட்டுள்ளன.

இந்நிலையில் புதிதாக, கூடுதலாக அமைக்கப்பட்டுள்ள வாக்குச் சாவடிகளில் வாக்குப்பதிவு அலுவலர்களுக்குத் தேவையான கழிப்பறை, குடிநீர் வசதி உள்பட அடிப்படை வசதிகள் அமைப்பது குறித்து தேர்தல் பிரிவு அதிகாரிகள் ஆய்வு செய்தனர். தற்போது அனைத்து வாக்குச்சாவடிகளுக்கும் தேவையான அடிப்படை வசதிகள் ஏற்படுத்தும் பணிகள் நிறைவடைந்தன.

இதுகுறித்து மாவட்ட தேர்தல் பிரிவு அதிகாரிகள் கூறுகையில்,‘வாக்குச் சாவடிகளில் தேவையான அடிப்படை வசதிகள் ஏற்படுத்தும் பணிகள் நிறைவடைந்துள்ளன. வெப் கேமிராக்கள் பொருத்தும் பணி தீவிரமாக நடைபெற்று வருகிறது' என்றார்.