அதிமுக-பாஜக கூட்டணியை தோற்கடிப்போம்; மத்திய தொழிற்சங்கங்கள் கூட்டமைப்பு தீர்மானம்

கோவை: அதிமுக, பாஜக அணியை தோற்கடித்து மதசார்பற்ற முற்போக்கு கூட்டணி வெற்றியை உறுதி செய்வோம் என மத்திய தொழிற்சங்கங்கள் கூட்டமைப்பு தீர்மானம் நிறைவேற்றி உள்ளது.

கோவை மாவட்ட அனைத்து தொழிற்சங்கங்களின் கூட்டு நடவடிக்கைக்குழு ஆலோசனை கூட்டம் சனியன்று திருச்சி சாலையில் உள்ள ஐஎன்டியுசி அலுவலகத்தில் நடைபெற்றது பி.சண்முகம் தலைமையில் நடைபெற்ற கூட்டத்தில் அனைத்து மத்திய தொழிற்சங்கங்களின் நிர்வாகிகள் பங்கேற்றனர்.



இக்கூட்டத்தில், நடைபெற உள்ள சட்டப்பேரவைத் தேர்தலில் அதிமுக-பாஜக கூட்டணிக்கு எதிராக தொடர்ந்து போராடி வரும் திமுக தலைமையிலான மதச்சார்பற்ற முற்போக்கு கூட்டணி கட்சிகளின் வேட்பாளர்களை வெற்றி பெறச்செய்வது என தீர்மானம் நிறைவேற்றப்பட்டது.

மேலும், பெட்ரோலிய பொருட்கள் விலை உயர்வால், அத்தியாவசிய பொருட்களின் விலையும் கடுமையாக உயர்ந்து மக்களின் மீது கொடூரமான தாக்குதல் நடக்கிறது. ஆகவே அதிமுக- பாஜக கூட்டணியை தமிழக உழைப்பாளி மக்கள் நிராகரிக்க வேண்டும் எனவும் கேட்டுக்கொள்ளப்பட்டது.

கோவை மாவட்டத்தில் உள்ள 10 தொகுதிகளில் மதச்சார்பற்ற முற்போக்கு கூட்டணியில் போட்டியிடும் வேட்பாளர்களை வெற்றி பெறச்செய்வது எனவும் தீர்மானம் நிறைவேற்றப்பட்டது.