கோவை அருகே பாக்கு தயாரிப்பு நிறுவனத்தில் குட்கா: வருமான வரித்துறையினர் சோதனையில் சிக்கியது!

கோவை: கோவை அருகே பாக்கு தயாரிப்பு நிறுவனத்தில் குட்கா இருந்தது கண்டுபிடிக்கப்பட்டது. வருமான வரித்துறையினர் நடத்திய சோதனையின்போது சிக்கியது.

கோவாவை தலைமையிடமாக கொண்ட 'கோவா கேஷ்யூ' மற்றும் 'யூனிகாட் புட் ப்ராடக்ட்ஸ்' எனும் நிறுவனம் கோவை அருகே அன்னுார் அச்சம்பாளையத்தில் செயல்பட்டு வருகிறது. இங்கு பாக்கு தயாரிக்கப்படுகிறது. இந்நிறுவனத்தில் நேற்றுமுன்தினம் வருமான வரித்துறை அதிகாரிகள், ஊழியர்கள் என எட்டு பேர் கொண்ட குழு சோதனை நடத்தியது.

நிறுவன வளாகத்தில் உள்ள தங்கும் விடுதிகள் மற்றும் தொழிற்சாலையில் சோதனை நடத்தினர். இதுகுறித்து வருமான வரித்துறையினர் கூறுகையில், இந்நிறுவனத்துக்குச் சொந்தமான மூன்று இடங்களில் சோதனை நடக்கிறது. இதில் தடை செய்யப்பட்ட குட்கா இருந்தது கண்டுபிடிக்கப்பட்டுள்ளது. வரி ஏய்ப்பு தொடர்பான ஆவணங்கள் கிடைத்துள்ளன' என்றனர்.

வருமான வரித்துறையினர் சோதனையை அடுத்து போலீசார் பாதுகாப்பு பணியில் ஈடுபட்டனர். வருமான வரித்துறை சோதனையால் நேற்று தொழிற்சாலை இயங்கவில்லை. தடை செய்யப்பட்ட குட்கா கிடைத்தது குறித்து உணவு பாதுகாப்புத்துறை அதிகாரிகளுக்கு வருமான வரித்துறையினர் தகவல் தெரிவித்தனர்.