கோவையில், படுகாயங்களுடன் மீட்கப்பட்ட கஞ்சா வியாபாரி உயிரிழப்பு: கொடூரமாக தாக்கப்பட்ட வீடியோ வைரல்!

கோவை: கோவையில், படுகாயங்களுடன் மீட்கப்பட்ட கஞ்சா வியாபாரி மருத்துவமனையில் உயிரிழந்தார். அவர் கொடூரமாக தாக்கப்பட்ட வீடியோ வைரலாக பரவி வருகிறது.

கோவை ரத்தினபுரி நல்லாம்பாளையம் பகுதியைச் சேர்ந்தவர் மணிகண்டன் . 23 வயதான இவர்எலக்ட்ரீசியனாக பணிபுரிந்து வந்தார். இவர் மீது பல்வேறு கஞ்சா வழக்குகள் உள்ளன. இந்நிலையில் கடந்த 25-ஆம் தேதி இரவு 11 மணியளவில் மணிகண்டன் வீட்டுக்குச் சென்ற 4 பேர் தங்களை காவல்துறையினர் என்று அறிமுகப்படுத்திக் கொண்டனர். அவர்கள் கஞ்சா வழக்கு தொடர்பாக விசாரிக்க வேண்டும் எனக் கூறி மணிகண்டனை அழைத்துச் சென்றனர்.

இந்நிலையில் மறுநாள் (26-ம் தேதி) காலை மணிகண்டனின் பெற்றோர் துடியலூர் காவல் நிலையம் சென்றபோது, தாங்கள் யாரையும் விசாரணைக்கு அழைத்து வரவில்லை என போலீசார் தெரிவித்தனர். இந்நிலையில் மேட்டுப்பாளையம் பத்திரகாளியம்மன் கோவில் பகுதியில் பலத்த காயங்களுடன் மணிகண்டன் கிடந்தார். அவரை மீட்ட மேட்டுப்பாளையம் போலீசார் கோவை அரசு மருத்துவமனையில் சிகிச்சைக்கு அனுமதித்தனர். இதையடுத்து தனியார் மருத்துவமனைக்கு மேல் சிகிச்சைக்கு மாற்றப்பட்ட மணிகண்டன் உயிரிழந்தார். மணிகண்டன் கொடூரமாக தாக்கப்பட்ட வீடியோ வெளியாகி வைரலாக பரவி வருகிறது.