கோவை கரும்புக்கடையில் 3 வயது குழந்தை சித்ரவதை: பெற்றோரிடம் போலீசார் விசாரணை!

கோவை: கரும்புக்கடை பகுதியில் 3 வயது குழந்தையை பெற்றோர் அடித்து துன்புறுத்துவதாக பொதுமக்கள் போலீசில் புகார் அளித்ததால் பரபரப்பு ஏற்பட்டது.

கரும்புக்கடை பகுதியில் ஒரு வீட்டில் மூன்று வயது குழந்தையை அவர்களது பெற்றோர் அடித்து துன்புறுத்துவதாகவும் அதனால் அந்தக் குழந்தைக்கு காயம் ஏற்பட்டிருப்பதாகவும் போத்தனூர் போலீசாருக்கு தகவல் கிடைத்தது. இதையடுத்து போத்தனூர் போலீசார் மற்றும் சைல்டு ஹெல்ப் லைன் அமைப்பினர் சம்பவ இடத்துக்கு விரைந்தனர்.

தொடர்ந்து சம்பவம் நடந்ததாக கூறப்படும் வீட்டிலிருந்த ஆண், பெண்ணைப் பிடித்து போத்தனூர் போலீசார் விசாரணை நடத்தினர். அப்போது போலீஸ் விசாரணையில் அந்தக் குழந்தையை அந்தத் தம்பதி தத்தெடுத்து வளர்த்து வருவது தெரியவந்தது.

இதையடுத்து அந்த வளர்ப்புத் தாய், தந்தையிடம் போத்தனூர் போலீசாரும், சைல்டு லைன் அலுவலர்களும் விசாரணை நடத்தி வருகின்றனர். உடலில் காயங்களுடன் இருந்த குழந்தையை போலீசார் சிகிச்சைக்காக கோவை அரசு மருத்துவமனையில் சேர்த்தனர். இந்த சம்பவத்தால் அப்பகுதியில் சிறிது நேரம் பரபரப்பு ஏற்பட்டது.