கோவையில் தென்மேற்கு பருவமழை 296 மி.மீ. பதிவு; இம்மாதம் 3வது வாரத்தில் வடகிழக்கு பருவமழை துவங்க வாய்ப்பு - வேளாண் பல்கலைக்கழகம் தகவல்

கோவை: கோவையில் நடப்பாண்டில் தென்மேற்கு பருவமழை 296 மி.மீ. அளவுக்கு பெய்துள்ளது, என கோவையில் உள்ள தமிழ்நாடு வேளாண் பல்கலைக்கழக காலநிலை ஆராய்ச்சி மைய தலைவர் தெரிவித்துள்ளார்.

கோவையில் கடந்த ஜூன் மாதம் துவங்கி செப்டம்பர் மாதம் வரை தென்மேற்கு பருவமழை பெய்தது. இதன் காரணமாக, நொய்யலில் தண்ணீர் வரத்து அதிகரித்ததால், உக்கடம் பெரியகுளம், வாலாங்குளம், நரசம்பதி, பேரூர் குளம், குறிச்சி குளம் உள்ளிட்ட பல்வேறு குளங்கள் நிரம்பின. மேலும், கோவையின் முக்கிய குடிநீர் ஆதரமான சிறுவாணி அணையின் நீர்மட்டமும் 40 அடிக்கு மேல் உயர்ந்து காணப்பட்டது.

இது குறித்து வேளாண் பல்கலைக்கழக காலநிலை ஆராய்ச்சி மையம் தலைவர் ராமநாதன் கூறுகையில், ‘‘கோவையில் ஜூன் மாதம் 22.5 மி.மீ. மழையும், ஜூலை மாதம் 83.5 மி.மீ. மழையும், ஆகஸ்ட் மாதம் 49.5 மி.மீ. மழையும், கடந்த செப்டம்பர் மாதம் 140.5 மி.மீ. மழையும் என மொத்தம் 296 மி.மீ. தென்மேற்கு பருவமழை பெய்துள்ளது. கோவையில் வடகிழக்கு பருவமழை இன்னும் துவங்கவில்லை. இம்மாதம் 3வது வாரத்தில் வடகிழக்கு பருவமழை துவங்க வாய்ப்பு உள்ளது. இந்த ஆண்டு சராசரி அளவிற்கு வடகிழக்கு பருவமழை பெய்யும் என எதிர்பார்க்கப்படுகிறது,’’ என்றார்.