கோவை: லாட்டரி அதிபர் மார்ட்டின் சகோதரரை கட்டிப்போட்டு 30 சவரன் நகை மற்றும் ரூ.45 ஆயிரம் பணத்தை மர்மகும்பல் கொள்ளையடித்து சென்ற சம்பவம் அப்பகுதியில் பரபரப்பை ஏற்படுத்தியுள்ளது.
கோவை: லாட்டரி அதிபர் மார்ட்டின் சகோதரரை கட்டிப்போட்டு 30 சவரன் நகை மற்றும் ரூ.45 ஆயிரம் பணத்தை மர்மகும்பல் கொள்ளையடித்து சென்ற சம்பவம் அப்பகுதியில் பரபரப்பை ஏற்படுத்தியுள்ளது.
கோவை ஜி என் மில்ஸ் அடுத்த உருமாண்டம்பாளையம் ராகவேந்திரா காலனியில் பகுதியில் லாட்டரி அதிபர் மார்ட்டின் சகோதரர் வேதமுத்து மனைவி செபஸ்தி ஆகியோர் வசித்து வருகின்றனர். இவர்களுடன் வேலைக்கார பெண் அருள்மேரி உடனிருந்து பணியாற்றி வருகிறார்.
இந்நிலையில், நேற்று இரவு 1 மணியளவில் வீட்டின் மதில் சுவரை தாண்டி குதித்த 5 பேர் கொண்ட கொள்ளை கும்பல் வீட்டின் முன்புற கதவை இரும்பு கம்பி கொண்டு உடைத்து உள்ளே புகுந்துள்ளனர்.
உள்ளே புகுந்த கொள்ளையர்கள் வீட்டில் தூங்கிக்கொண்டிருந்த வேலைக்கார பெண் அருள்மேரி மற்றும் மார்ட்டின் சகோதரர் வேதமுத்து அவரது மனைவி செபஸ்தி ஆகியோரை கட்டிப்போட்டு பீரோவை திறந்து அதிலிருந்த 30 சவரன் நகை மற்றும் 45 ஆயிரம் ரொக்கப் பணத்தை கொள்ளையடித்து சென்றுள்ளனர்.
இது குறித்து ஒருவருக்கொருவர் தங்களது கைகளை அவிழ்த்து துடியலூர் காவல் துறைக்கு தகவல் தெரிவித்தனர். இதனை தொடர்ந்து சம்பவ இடத்திற்கு விரைந்து வந்த துடியலூர் காவல்துறையினர் மற்றும் கோவை மாவட்ட காவல் கண்காணிப்பாளர் சுஜித்குமார் துணை காவல் கண்காணிப்பாளர் ஆகியோர் கைரேகை நிபுணர்கள் மற்றும் மோப்ப நாய் உதவியுடன் விசாரணை மேற்கொண்டனர்.
மேலும், அப்பகுதியில் உள்ள சிசிடிவி காட்சிகளை கொண்டு விசாரணை மேற்கொண்டு வருகின்றனர். கொள்ளையர்களில் 4 பேரும் இந்தியில் பேசி கூறப்பட்டதைத் தொடர்ந்து இது வட மாநிலத்தவரின் கைவரிசையா? என்ற கோணத்தில் விசாரணை மேற்கொண்டு வருகின்றனர். லாட்டரி அதிபர் மார்ட்டின் சகோதரரை கட்டிப்போட்டு கொள்ளையடித்த சம்பவம் அப்பகுதியில் பெரும் பரபரப்பை ஏற்படுத்தி உள்ளது.