தமிழகத்தில் மேலும் 66 பேருக்கு கொரோனா தொற்று உறுதி..! கோவை, திருப்பூர் மற்றும் நீலகிரியில் புதிதாக யாருக்கும் பாதிப்பு இல்லை!

கோவை: தமிழகத்தில் மேலும் 66 பேருக்கு கொரோனா தொற்று உறுதி செய்யப்பட்டுள்ள நிலையில் வைரசால் பாதிப்பு அடைந்தோர் எண்ணிக்கை 1821 ஆக அதிகரித்துள்ளது. 

உலகையே அச்சுறுத்தி வரும் கொரோனா வைரசின் தாக்கம் தமிழகத்தில் நாளுக்கு நாள் அதிகரித்து வருகிறது. கொரோனா பரவலைக் கட்டுப்படுத்த தடை உத்தரவு பிறப்பிக்கப்பட்டுள்ள போதிலும், தொடர்ந்து கொரோனா தொற்று உறுதி செய்யப்பட்டவர்களின் எண்ணிக்கை அதிகரித்துக்கொண்டே வருகிறது.

இதனிடையே, தமிழக அரசு நேற்று வெளியிட்ட தகவலின்படி, தமிழகத்தில் கொரோனோ தொற்று உறுதி செய்யப்பட்டவர்களின் எண்ணிக்கை 1755 ஆக இருந்தது. 

இந்நிலையில், தமிழகத்தில் மேலும் 66 பேர் கொரோனா வைரஸ் தொற்றால் பாதிக்கப்பட்டுள்ளதாக சுகாதாரத்துறை அமைச்சர் விஜயபாஸ்கர் தெரிவித்துள்ளார். 

இதுதொடர்பாக, தமிழக சுகாதாரத் துறை அமைச்சர் வெளியிட்டுள்ள அறிக்கையில், தமிழகத்தில் கொரோனா வைரசால் இன்று மேலும் 66 பேர் பாதிப்பு அடைந்துள்ளனர். இதையடுத்து கொரோனாவால் பாதிப்பு அடைந்தோர் எண்ணிக்கை 1821 ஆக அதிகரித்துள்ளது. 

மேலும், தமிழகத்தில் இன்று மட்டும் 94 பேர் குணமடைந்து டிஸ்சார்ஜ் ஆகியுள்ளனர். தமிழகத்தில் மொத்தம் குணமடைந்தவர்களின் எண்ணிக்கை 960ஆக அதிகரித்துள்ளது. அதேபோல, கொரோனா வைரஸ் பாதிப்பால் இன்று மேலும் ஒருவர் உயிரிழந்துள்ளனர். இதன் தற்போது மூலம் தற்போது வரை 23 பேர் உயிரிழந்துள்ளதாக தெரிவிக்கப்பட்டுள்ளது. 

சென்னையில் இன்று மட்டும் 43 பேருக்கு புதிதாக கொரோனா தொற்று உறுதி செய்யப்பட்டுள்ளதன் மூலம் பாதிப்பு 495 ஆக அதிகரித்துள்ளது. அதேசமயம், கோவையில் இன்று புதிதாக யாருக்கும் கொரோனா பாதிப்பு உறுதி செய்யப்படவில்லை. இதன் மூலம் கோவையில் பாதிப்பு அடைந்தோர் எண்ணிக்கை 141 ஆக உள்ளது. 

இதேபோல, திருப்பூர் மற்றும் நீலகிரியிலும் புதிதாக யாருக்கும் கொரோனா பாதிப்பு ஏற்படவில்லை. இதன் மூலம் திருப்பூர் மாவட்டத்தில் பாதிக்கப்பட்டவர்களின் எண்ணிக்கை 110 ஆகவும், நீலகிரியில் பாதிக்கப்பட்டவர்களின் எண்ணிக்கை 9 ஆக உள்ளது.