கோவை: கோவையில் ரூட்ஸ் நிறுவனத்திற்கு சொந்தமான பெட்ரோல் பங்கில் பணிபுரியும் ஊழியரை தாக்கிய விவகாரத்தில் பாதிக்கப்பட்டவர் கொடுத்த புகாரின் பேரில் சரவணம்பட்டி போலீசார் நான்கு பேர் மீது வழக்கு பதிவு செய்துள்ளனர்.
கோவை: கோவையில் ரூட்ஸ் நிறுவனத்திற்கு சொந்தமான பெட்ரோல் பங்கில் பணிபுரியும் ஊழியரை தாக்கிய விவகாரத்தில் பாதிக்கப்பட்டவர் கொடுத்த புகாரின் பேரில் சரவணம்பட்டி போலீசார் நான்கு பேர் மீது வழக்கு பதிவு செய்துள்ளனர்.
கோவை கண்ணப்பநகர் பகுதியை சேர்ந்த தம்பதிகள் மணிகண்டன் (35) மற்றும் சவிதா(30). இவர்கள் எருக்கம்பெனி பகுதியில் உள்ள ரூட்ஸ் நிறுவனத்திற்குச் சொந்தமான பெட்ரோல் பங்கில் கடந்த 8 ஆண்டுகளுக்கும் மேலாக பணிபுரிந்து வருகின்றனர். இந்த நிலையில் கடந்த 3 மாதங்களுக்கு முன்பு சவிதா தாங்கள் பணி புரிந்து வரும் பெட்ரோல் பங்கில் உள்ள அறையில் உடைமாற்றி கொண்டிருந்தார். அப்போது, அவருக்கு ரகசியமாக வீடியோ எடுப்பது போன்று தெரிந்துள்ளது. இதையடுத்து அவர் தனது கணவரிடம் தெரிவித்துள்ளார்.
பின்னர் கணவர் மணிகண்டன் சந்தேகத்துக்குரிய நபரான சூப்பர்வைசர் சுபாஸ் மீது நிர்வாகத் தரப்பில் புகார் தெரிவித்தார். இதையடுத்து பேச்சுவார்த்தைக்குப் பின்பு சமரசம் செய்யப்பட்டது. அதேசமயம், ரகசியமாக உடைமாற்றும் அறையில் கேமராவை வைப்பதையும், ரெக்கார்ட் செய்த வீடியோக்களையும் சவிதாவின் கணவர் மணிகண்டன் ஆதாரமாக சேமித்து வைத்திருப்பது நிர்வாக தரப்புக்கு தெரியவந்தது.
இதையடுத்து, இன்று மணிகண்டன் வைத்துள்ள ஆதார வீடியோக்களை அழிக்கும் படி நிர்வாகத் தரப்பில் தெரிவித்ததாக கூறப்படுகிறது. இந்தநிலையில் மணிகண்டன் வீடியோவை அழிக்க மறுத்ததால் தாக்கப்பட்டு கோவை அரசு மருத்துவமனையில் அனுமதிக்கப்பட்டு சிகிச்சை அளிக்கப்பட்டு வந்தது.
இதனையடுத்து அவர் அளித்த புகாரின் பேரில் மேலாளர் சங்கர் கணேஷ், மனிதவள மேம்பாட்டு அதிகாரி கவிதாசன், மக்கள் தொடர்பு அதிகாரி சரவணன், செக்யூரிட்டி அலுவலர் ஆகிய 4 பேர் மீது சரவணம்பட்டி போலீசார் பிரிவு 75 (1)(c), தமிழ்நாடு சிட்டி போலீஸ் சட்டம், 323 காயம் விளைவித்தல் ஆகிய மூன்று பிரிவுகளின் கீழ் வழக்கு பதிவு செய்துள்ளனர்.
இந்த நிலையில், கோவை அரசு மருத்துவமனையில் சிகிச்சை பெற்று வந்த மணிகண்டன் இன்று மருத்துவமனையில் இருந்து சிகிச்சை முடிந்து சென்ற நிலையில், மருத்துவமனைக்கு வெளியே காத்திருந்த சரவணம்பட்டி போலீசார் அவரை விசாரணைக்காக காவல் நிலையம் அழைத்துச் சென்றனர்.