கோவையில் ஊரக உள்ளாட்சி தேர்தலுக்கு 8,403 மனுக்கள் ஏற்பு; 323 மனுக்கள் தள்ளுபடி

கோவை: கோவை மாவட்டத்தில் ஊரக உள்ளாட்சி தேர்தலுக்கு மனுதாக்கல் செய்திருந்த 8,726 மனுக்களில் 8,403 மனுக்கள் ஏற்றுக்கொள்ளப்பட்டன. 323 மனுக்கள் தள்ளுபடி செய்யப்பட்டன.

தமிழகத்தில் புதியதாக பிரிக்கப்பட்ட 9 மாவட்டங்களை தவிர்த்து ஊரக உள்ளாட்சி அமைப்புகளுக்கான தேர்தல் இரண்டு கட்டங்களாக நடக்கிறது. அதன்படி, வரும் 27, 30 ஆகிய தேதிகளில் தேர்தல் நடக்கிறது. இதற்கான வேட்பு மனு தாக்கல் கடந்த 9ம் தேதி முதல் துவங்கி, 16ம் தேதியுடன் முடிந்தது.

கோவை மாவட்டத்தில் 12 ஊராட்சி ஒன்றியங்கள் உள்ளது. இதில் 228 ஊராட்சிகளுக்கு தேர்தல் நடத்தப்படவுள்ளது. மேலும், 228 கிராம ஊராட்சிகளில் 2,034 வார்டு கவுன்சிலர், 155 மாவட்ட கவுன்சிலர், 228 கிராம பஞ்சாயத்து தலைவர் பதவி, 17 மாவட்ட வார்டு கவுன்சிலர் பதவிக்கு தேர்தல் நடக்கிறது.

இந்நிலையில், மொத்தம் 8,726 பேர் மனு தாக்கல் செய்திருந்தனர். இதில் மாவட்ட ஊராட்சி வார்டு உறுப்பினர் பதவிக்கு 110 பேரும், ஊராட்சி ஒன்றிய வார்டு உறுப்பினர் பதவிக்கு 859, ஊராட்சி மன்ற தலைவர் பதவிக்கு 1,179 பேரும் ஊராட்சி வார்டு உறுப்பினர் பதவிக்கு 6,578 பேரும் மனு தாக்கல் செய்திருந்தனர். இந்த வேட்பு மனுக்கள் மீதான பரீசிலனை நேற்று நடந்தது.

இதில் மாவட்ட ஊராட்சி உறுப்பினர் பதவிக்கு 102, ஊராட்சி வார்டு உறுப்பினர் பதவிக்கு 783, ஊராட்சி மன்ற தலைவர் பதவிக்கு 1,097, ஊராட்சி மன்ற வார்டு உறுப்பினர் பதவிக்கு 6,421 என மொத்தமாக 8403 பேரின் வேட்பு மனுக்கள் ஏற்றுக்கொள்ளப்பட்டது. 323 பேரின் மனுக்கள் தள்ளுபடி செய்யப்பட்டது.

வேட்புமனுக்கள் மீதான பரிசீலனை 17ம் தேதி நடைபெற்ற நிலையில், மனுக்களை வாபஸ் பெற இன்று கடைசி நாளாகும். இதன் தொடர்ச்சியாக இன்று மாலை இறுதி வேட்பாளர் பட்டியல் வெளியிடப்படும் என தேர்தல் ஆணையம் அறிவித்துள்ளது. தொடர்ந்து சின்னங்கள் ஒதுக்கீடு செய்யும் பணி தொடங்கும் என தெரிவிக்கப்பட்டுள்ளது.