குளிர்பான பாட்டிலில் பாலிதீன் பேப்பர் இருந்த வழக்கு : கொக்கோ-கோலா நிறுவனத்திற்கு அளித்த தீர்ப்பிற்கு வரவேற்பு

கோவை : குளிர்பான பாட்டிலில் பாலிதீன் பேப்பர் இருந்ததாக தொடரப்பட்ட வழக்கில், கொக்கோ-கோலா நிறுவனத்திற்கு ரூ. 1 லட்சம் அபராதம் விதித்ததுடன், அப்பகுதியில் உள்ள 100 ஆதரவற்ற குழந்தைகளுக்கு தேவையான சத்தான பொருட்களை வழங்கவும் கோவை நுகர்வோர் நீதிமன்றம் உத்தரவிட்டுள்ளது. 

கோவை சி.எம்.சி. காலனியைச் சேர்ந்த பூர்ணிமா (21) என்பவர் கடந்த 2014-ம் ஆண்டு அதே பகுதியில் உள்ள மளிகைக் கடையில் 200 மில்லி கொள்ளளவு கொண்ட கொக்கோ-கோலா குளிர் பானத்தை ரூ. 12-க்கு வாங்கி உள்ளார். அவர் வாங்கிய குளிர் பாட்டிலில் பாலித்தீன் பேப்பர் இருந்ததை அடுத்து, மளிகை கடைக்கு சென்று இது குறித்த கேட்டுள்ளார். அப்போது, இது குறித்து கொக்கோ-கோலா நிறுவனத்திடம் போய் கேட்டு கொள்ளுங்கள் என கடைக்காரர் கூறியுள்ளார். இதனால், தனக்கு ஏற்பட்ட மன உளைச்சலுக்கு உரிய நடவடிக்கை எடுக்கக்கோரி கோவை நுகர்வோர் நீதிமன்றத்தில் பூர்ணிமா வழக்கு தொடர்ந்தார்.

இந்த வழக்கை விசாரித்த நுகர்வோர் நீதிமன்றம், தரமற்ற வகையில் குளிர்பானம் தயாரித்த கொக்கோ-கோலா நிறுவனத்திற்கு ரூ. 75,000 அபராதமும், தர பரிசோதனை செய்யாமல் விற்பனை செய்த மளிகை கடைக்காரரான ஜவகர் ராஜுக்கு ரூ.25,000 அபராதமும் விதிக்கப்பட்டது. மேலும், வழக்கு செலவிற்கு ரூ. 3,000 மற்றும் மனுதாரர் கோரிக்கைப்படி அபராதத் தொகையை அந்தப் பகுதியில் உள்ள 100 ஆதரவற்ற மற்றும் வசதி குறைவான குழந்தைகளுக்கு பழங்கள் மற்றும் சத்து பொருட்களாக ஒரு மாதம் வழங்க கொக்கோ-கோலா நிறுவனத்திற்கு உத்தரவிடப்பட்டது.